საქართველოს პრემიერ-მინისტრის, გიორგი კვირიკაშვილის დავალებით, ბორჯომში, წაღვერის ტყეში, სოფელ დაბასთან გაჩენილი ხანძრის მაქსიმალურად მოკლე ვადაში ლიკვიდაციის მიზნით, საგანგებო შტაბი შეიქმნა. ამის შესახებ ინფორმაცია პრემიერ-მინისტრის ფეისბუკ გვერდზე გავცრელდა.

პრემიერის ინფორმაციით, შტაბის შემადგენლობაში შედიან შინაგან საქმეთა, გარემოს დაცვის, რეგიონული განვითარებისა და ინფრასტრუქტურის სამინისტროების, ადგილობრივი ხელისუფლების და კრიზისების მართვის საბჭოს აპარატის წარმომადგენლები.

"საგანგებო შტაბი სტიქიის სალიკვიდაციო სამუშაოებზე 24-საათიან რეჟიმში იმუშავებს", - დასძენს პრემიერი.

ბორჯომში, წაღვერის ტყეში, სოფელ დაბის მიმდებარე ტერიტორიაზე ტყეში ხანძრის კერები, ძლიერი ქარის გამო, გაღვივდა. ხანძრის ჩასაქრობი სამუშაოები შეწყვიტეს საქართველოსა და აზერბაჯანის ვერტმფრენებმა. ამ ეტაპზე, 270-მდეა გაზრდილი მეხანძრეების რაოდენობა, ვერტმფრენები კი სამუშაოებში ნებართვის მიღებისთანავე ჩაერთვებიან.

საზოგადოებრივი მაუწყებლის ინფორმაციით, ხანძრის გამო, სოფელ დაბის მოსახლეობის ნაწილი სახლებს ტოვებს. ამ ინფორმაციას უარყოფს ბორჯომის გამგებელი.