დღეს, 11 ნოემბერს, რვა ქვეყნის საგარეო საქმეთა უწყების წარმომადგენლებს ის არასამთავრობო ორგანიზაციებიც შეხვდებიან, რომლებიც აქტიურად არიან ჩართული საქართველოში ჩატარებული 26 ოქტომბრის არჩევნების წინააღმდეგ გამართულ სასამართლო პროცესებში და ამტკიცებენ, რომ არჩევნები გაყალბებულია.

როგორც არასამთავრობო ორგანიზაცია "სამართლიანი არჩევნების" ხელმძღვანელი, ნინო დოლიძე აცხადებს, შეხვედრისას ყველა მტკიცებულება იქნება წარდგენილი ლიდერებისთვის, რომელთა შეგროვებაც, არჩევნების მსვლელობის დროს მოხდა.

"ძალიან მნიშვნელოვანია, რომ ასეთი მაღალი დონის, მრავალი ქვეყნის წარმომადგენლისგან შემდგარი დელეგაცია არის საქართველოში. ეს მიანიშნებს მათ მაღალ ინტერესზე ქვეყანაში ჩატარებულ არჩევნებთან დაკავშირებით და ჩვენი მიზანია, რომ კიდევ უფრო ნათლად ავუხსნათ ყველა ის საკითხი და პრობლემა, დარღვევა რაც ჩვენ ვიხილეთ ამ არჩევნებზე და ყველამ ერთად ვთქვით, რომ ეს ვერ იქნებოდა ქართველი ხალხის ნების გამოხატულება. ყველანაირ შესაძლებლობას ვიყენებთ იმისთვის, რომ ეს ყველაფერი კარგად ავუხსნათ ჩვენს პარტნიორებს და ასევე წარვადგინოთ ის მტკიცებულებები და ფაქტები, რომლებიც გაგვაჩნია", — განაცხადა დოლიძემ.