თბილისის საპატრულო პოლიციის უფროსის მოადგილემ, გოგა მემანიშვილმა მტკვრის მარცხენა სანაპიროზე მყოფ აქციის მონაწილეებს, რომელთაც გზის სავალი ნაწილი აქვთ გადაკეტილი განუცხადა, რომ გაათავისუფლონ გზა, წინააღმდეგ შემთხვევაში მოხდება მათი იდენტიფიცირება, აქციის ორგანიზატორები დაჯარიმდებიან 5 000 ლარით, მონაწილეები — 500 ლარით. მისივე თქმით, სამართალდარღვევის ოქმები არ გამოიწერება, აქციის მონაწილეებს დაიბარებენ სასამართლოში. პოლიციის მაღალჩინოსნის მიმართვას მთავარი ავრცელებს.

"გაათავისუფლეთ გზის სავალი ნაწილი, წინააღმდეგ შემთხვევაში მოხდება თქვენი იდენტიფიცირება, აქციის ორგანიზატორები დაჯარიმდებიან 5000 ლარით, აქციის მონაწილეები — 500 ლარით, ახლა თქვენ გინდათ მოუწოდეთ და გადაიყვანეთ ხალხი სავალი ნაწილიდან, ან ჩვენ ვიწყებთ ამ ხალხის იდენტიფიცირებას", — განაცხადა გოგა მემანიშვილმა.

თბილისის საპატრულო პოლიციის უფროსის მოადგილის თქმით, მტკვრის მარჯვენა სანაპიროზე მყოფ აქციის მონაწილეებსაც იგივე განმარტება მიეცათ.

ამისივე თქმით, ამ ლოკაციაზე, ამ დროს არ არის იმის საჭიროება, რომ გზის სავალი ნაწილი გადაიკეტოს.

"სამართალდარღვევის ოქმები არ გამოიწერება, აქციის მონაწილეების იდენტიფიცირება მოხდება და დაიბარებენ სასამართლოში", — განაცხადა გოგა მემანიშვილმა.

"არ ვაღიარებთ ამ არჩევნებს" — ამ მოწოდებით ჯგუფი დაიტოვეს მიერ ორგანიზებული აქციის მონაწილეებმა მტკვრის ორივე სანაპირო გადაკეტეს. შეკრება თავისუფლების მოედნიდან ბარათაშვილის ხიდის მიმართულებით 18:00 საათზე დაიწყო და მსვლელობით გაგრძელდა.

აქციის მონაწილეები მიიჩნევენ, რომ ქვეყანაში 26 ოქტომბერს ჩატარებული საპარლამენტო არჩევნები გაყალბდა და მოითხოვენ, რომ ქვეყანაში ხელახალი არჩევნები ჩატარდეს. ორგანიზატორების თქმით, ეს დაიტოვეს გარე სივრცეში მოქმედებების დასაწყისია და ამ მსვლელობით სურთ საფუძველი ჩაეყაროს შემდეგ ერთობლივ ბრძოლას.