ორი ადამიანი დაიღუპა და მინიმუმ ექვსი დაიჭრა ფინეთში მომხდარი თავდასხმის დროს. ინფორმაციას ადგილობრივ პოლიციაზე დაყრდნობით BBC ავრცელებს.

თავდასხმა ქვეყნის ყოფილ დედაქალაქში, თურქუში, მოხდა. თავდამსხმელმა მოქალაქეები ქუჩაში დანით დაჭრა და როცა დანაშაულის ადგილიდან გაქცევას ცდილობდა, პოლიციამ ის ფეხში დაჭრა და დააპატიმრა.

პოლიცია აცხადებს, რომ შესაძლოა არსებობდეს კიდევ რამდენიმე თავდამსხმელი, რის გამოც, მოქალაქეებს მოუწოდებს, ქალაქის ცენტრისკენ არ გადააადგილდნენ. ქვეყნის მასშტაბით მატარებლების სადგურებსა და აეროპორტებში უსაფრთხოების ზომები გამკაცრებულია.

ფინეთის პრემიერმინისტრის განცხადებით, აღნიშნულთან დაკავშირებით მთავრობის საგანგებო სხდომა უკვე დაიგეგმა.

თურქუ ფინეთის დედაქალაქიდან 140 კილომეტრში მდებარეობს.