მას შემდეგ, რაც საფრანგეთის პირველი ლედი გახდა, ბრიჯიტ მაკრონმა პირველი ვრცელი ინტერვიუ მისცა Elle-ს. ინტერვიუში ის იმ თემასაც შეეხო, რომელზეც პრესა ყველაზე ხშირად წერს.

ბრიჯიტი 64 წლისაა, საფრანგეთის პრეზიდენტი - 39-ის. ისინი ერთმანეთს პირველად 20 წლის წინ შეხვდნენ, როდესაც ემანუელ მაკრონი დრამის ლექციებს ესწრებოდა. ბრიჯიტი მაშინ ლექტორი იყო.

უცნობია, როდის დაიწყო წყვილის ურთიერთობა. 10 წლის წინ, ისინი დაქორწინდნენ.

Elle France-სთან ინტერვიუში, ბრიჯიტი ამბობს, რომ მათი ურთიერთობა შეხვედრისთანავე არ დაწყებულა: "იმ დროს, მხოლოდ ჩემს სამ შვილზე ვფიქრობდი, სებასტიანზე, ლორენსსა და ტიფანიზე".

ბრიჯიტი ამბობს, რომ, როდესაც უკან იხედება, ხვდება, რომ თუ საყვარელ კაცთან ყოფნის გადაწყვეტილებას არ მიიღებდა, ის არასდროს იქნებოდა ისეთი ბედნიერი, როგორიც ახლაა:

"შენს ცხოვრებაში დგება მომენტი, როდესაც გადამწყვეტი არჩევანი უნდა გააკეთო. ჩემთვის ასეთი ზუსტად ეს იყო. ის, რასაც 20 წელზე მეტ სხვაობას უწოდებენ, სინამდვილეში უმნიშვნელოა.

ფოტო: Getty Images

რა თქმა უნდა, ჩვენ ერთად ვსაუზმობთ, მე - ნაოჭებით, ის თავისი ახალგაზრდობით, მაგრამ ეს უბრალოდ ასეა. მე რომ მასთან ყოფნის გადაწყვეტილება არ მიმეღო, ჩემს ნამდვილ ცხოვრებაზე უარს ვიტყოდი. შვილები ყოველთვის დიდ ბედნიერებას მანიჭებდნენ, მაგრამ, ამავე დროს, ვგრძნობდი, რომ ეს სიყვარული მჭირდებოდა, როგორც ჟაკ პრევერი ამბობს, სრულყოფილი ბედნიერებისთვის".

აღსანიშნავია, რომ ასაკობრივი სხვაობა ბრიჯიტსა და ემანუელ მაკრონებს შორის, ზუსტად იგივეა, რაც დონალდ და მელანია ტრამპებს შორის, თუმცა ამ უკანასკნელებს მედიისგან ანალოგიური კრიტიკა არ შეხვედრიათ.

როდესაც საპრეზიდენტო კამპანიის დროს მის ასაკზე აგორებულ სპეკულაციებს იხსენებს, ბრიჯიტი ამბობს რომ ეს მისთვის ძალიან რთული იყო:

"საბოლოოდ ჩემს თავს ვუთხარი, კარგი, ეს უსიამოვნოა, მაგრამ უნდა შეეგუო. ამ ყველაფრის შემდეგ, ესეც ჩაივლის".

ბრიჯიტ მაკრონთან სრულ ინტერვიუს Elle France დღეს, 18 აგვისტოს, გამოაქვეყნებს.