ვენესუელის არაღიარებულმა პრეზიდენტმა, ნილას მადურომ, რომელიც რუსეთის მოკავშირეა და სამხრეთ ოსეთისა და აფხაზეთის დამოუკიდებლობასაც აღიარებს, განაცხადა, რომ ქართულმა ოცნებამ სამაგალითო გამარჯვებას მიაღწია და მათ, გამარჯვება მიულოცა.

"საქართველო, საბჭოთა კავშირის დაშლის შემდეგ, აშშ-სთან მჭიდროდ დაკავშირებულ გზას დაადგა. თუმცა წლების განმავლობაში გაჩნდა და ხელისუფლებაში მოვიდა პროგრესული მემარცხენე და ნაციონალისტური ხელისუფლება. გასულ კვირას მათ საქართველოს მოსახლეობის ხმების 56%-ით, სამაგალითო გამარჯვება მოიპოვეს", — განაცხადა მადურომ.

გამოცემა Sputnik-ის ცნობით, მადურომ თქვა, რომ ვაშინგტონი ისე ერევა საქართველოს საქმეებში, თითქოს მისი კოლონიაა.

საპრეზიდენტო არჩევნები ვენესუელაში ივლისში გაიმართა. შედეგების გამოცხადების შემდეგ მადურო ქვეყნის შიგნით და ქვეყნის გარედან წნეხში მოექცა. ოფიციალური მონაცემებით, მადურომ ხმების 52% მიიღო და პოსტი მესამე ვადით გაინაღდა. ოპოზიცია ამტკიცებს, რომ არჩევნების შედეგები გაყალბებულია და სინამდვილეში მადურომ ხმების 30% მიიღო, ოპოზიციის ლიდერმა ედმუნდო გონსალესმა კი — 67%.

ცნობისთვის, ვენესუელაში, არჩევნების შედეგებს არ აღიარებს აშშ და ევროკავშირი. მადუროს პრეზიდენტობას არ აღიარებს "ოცნების" მთავრობაც.