ვიქტორ ორბანმა ირაკლი კობახიძესთან ერთობლივი პრესკონფერენცია გამართა. უნგრეთის პრემიერმინისტრმა კოლეგას არჩევნებში გამარჯვება მიულოცა და ორი ქვეყნის ურთიერთობებზე ისაუბრა. ორბანმა გაიზიარა მმართველი პარტიის წინასაარჩევნო რიტორიკა მშვიდობასთან დაკავშირებით და ამისთვის ოცნება შეაქო.

"მინდა, მივულოცო საქართველოს მთავრობას, რომ არსებულ პირობებში, როდესაც თქვენ პროევროპულ პოლიტიკას ახორციელებთ, არ დაუშვით, თქვენი ქვეყანა მეორე უკრაინად გადაქცეულიყო", — განაცხადა ვიქტორ ორბანმა.

ვიქტორ ორბანმა კომენტარი გააკეთა ევროპელი პოლიტიკოსების მიერ საქართველოს საპარლამენტო არჩევნების გაკრიტიკებაზე, მან ირაკლი კობახიძეს ურჩია, ამას ყურადღება არ მიაქციოს.

"უნგრეთის პრემიერ-მინისტრის რანგში, რომელსაც ბევრი დავა მომიგია, მინდა გითხრათ, რომ მომავალშიც იქნება კამათი, მაგრამ ეს ისე უნდა მიიღოთ, როგორც აქამდე ხდება. არჩევნების შედეგები უდაოა! თავისუფალი და დემოკრატიული არჩევნები ჩატარდა, მაგრამ ევროპაში კამათი მაინც იქნება. თქვენ ამას სერიოზულად არ უნდა შეხედოთ, რადგან ეს ჩვეული ამბავია. მსგავსი სახის კამათი არსებობს, ბრიუსელში ყოველთვის ასეა. როდესაც არჩევნებს თავისი არსით კონსერვატიული პარტიები იგებენ, ასეთ კამათს ყოველთვის ვხედავთ. ევროპული პოლიტიკა სახელმძღვანელოზეა დაფუძნებული - თუ ლიბერალები იმარჯვებენ, მაშინ დემოკრატიაა, თუ კონსერვატორები იმარჯვებენ, მაშინ დემოკრატია არ ყოფილა. ასეთი კამათი ბრიუსელში ყოველთვის ხდება — არჩევნები უნგრეთში ჩატარდება თუ ნებისმიერ სხვა ქვეყანაში, ასე იქნება და ასე აღიქვამენ“, — განაცხადა ვიქტორ ორბანმა.