არავის რომ არ აინტერესებდა ჩვენი ფოლკლორული მუსიკის შენახვა-კვლევა, ევროკავშირის დაფინანსებით მოხდა ის, რომ საფუძვლიანად არის გამოკვლეულ-შენახული ეს მუსიკა, — ამის შესახებ გიორგი გიგაშვილი სოციალურ ქსელში წერს.

"არ შეიძლება ასე!!! არ შეიძლება. მართლა დიდი ხანია ვისმენ ამას და გული მერევა ყველაფერზე, რასაც ლაპარაკობს, რაც უქნა ამ ქალმა კულტურას და როგორ არ გაითვალისწინა არც ერთი ადამიანის თხოვნა, სიტყვა, გაფიცვა, ყვირილი, წივილი, ჩუმი ლაპარაკი, "გთხოვთ", "მოგთხოვთ".

და ახლა უსირცხვილოდ ლაპარაკობს ევროკავშირის "ერთ-ერთი დიდი ქვეყნის ელჩზე”. ძალიან მინდა იმ "ერთ-ერთმა დიდმა ქვეყანამ” მოსთხოვოს რომ თქვას სახელი, გვარი, რომელი ქვეყანა იყო. იმიტომ რომ ვერავინ დამაჯერებს ამ ისტორიის სიმართლეში, რადგან მრავალსაუკუნოვანი ქართული მუსიკის პირველი დამცველია ევროკავშირი!
არავის რომ არ აინტერესებდა ჩვენი ფოლკლორული მუსიკის შენახვა-კვლევა, ევროკავშირის დაფინანსებით მოხდა ის, რომ საფუძვლიანად არის გამოკვლეულ-შენახული ეს მუსიკა.
თეა, შენი დამსახურებაა კულტურის სფეროში, თითქმის ყველა მიმართულებით არაპროფესიონალი ადამიანები რომ ბუდობენ და მათ რომ მიჰყავთ პარადი. ნიშნის მოგებით რომ არ დაგეწყო შენი მინისტრობა და ყვირილით, მაგიდაზე კალმის რტყმით და მუქარით; რომ მოგესმინა ჩვენი(ც) ზოგჯერ, და გამწარებული და ნერვიული არ ყოფილიყავი სულ იქნებ რამე გამოგსვლოდა.

მაგრამ კულტურის სფეროს ხალხის გადამტერება ძალიან ცუდი რაღაც არის, და ეს არ ეგონა ესეთი რთული. ზუსტად ვიცი. ძალიან ბევრ რაღაცას ნიშნავს, როდესაც ხალხი - მუსიკიდან, კინოდან, თეატრიდან, მწერლობიდან - არ გენდობა, არ უყვარხარ, შენთან თანამშრომლობა არ უნდათ (ნიჭიერებზე ვამბობ).

ყველაფერზე პასუხი უნდა აგო და იმედია ოდესმე მომეცემა საშუალება პირისპირ გითხრა ეს ყველაფერი. არასდროს არ მოინდომე იმათთან შეხვედრა, ვისაც რამე სათქმელი ჰქონდა შენთვის (კრიტიკა)" — წერს პიანისტი გიორგი გიგაშვილი სოციალურ ქსელში თეა წულუკიანის განცხადების პასუხად.

წულუკიანის თქმით, ერთ-ერთ ელჩთან, "იმ ზრდილობის და იმ ეტიკეტის ფარგლებში, რაც სხვა ქვეყნის წარმომადგენელ დიპლომატს ეკუთვნის", "ძალიან უსიამოვნო" საუბარი ჰქონდა

"როდესაც ვუთხარი, "თქვენს სიაში ერთი ადამიანიც კი არ არის, რომელიც, მაგალითად, ქართულ მრავალხმიანობას წარმოადგენს, ესე იგი, რას მეუბნებით, რომ ქართული მრავალხმიანობა არ არის ქართული კულტურის ნაწილი?" და ა.შ.

მაშინ ის გაკადნიერდა და მითხრა ასეთი რამ - "თქვენ ძალიან ბევრს საუბრობთ საქართველოს რეგიონებზე და მინდა იცოდეთ, რომ საქართველო მხოლოდ სოფელი არ არის". აქ საუბარი კიდევ უფრო დაიძაბა და რეალურად, მე წავიყვანე ეს საუბარი ბოლოსკენ და მას ავუხსენი, რომ საქართველო არის სოფელიც, საქართველო არის ჩვენი ლამაზი დედაქალაქიც და ეს სამინისტრო არის ყველასთვის. ამით მე ვცდილობ აგიხსნათ, თუ საიდან დავიწყეთ, რომ კულტურის სამინისტრო უნდა ყოფილიყო მძევალი კონკრეტული ერთი ჯგუფის და აქედან ჩვენ გავთავისუფლდით" — თქვა წულუკიანმა სამთავრობო TV იმედის გადაცემაში ნოესთან.