რუსთავი 2-ზე გიორგი გაბუნიას გადაცემაში შალვა ნათელაშვილმა განაცხადა, რომ მისთვის მოულოდნელი არ ყოფილა თბილისის სააპელაციო სასამართლოს გადაწყვეტილება, რომელიც არ ცვლის მოსამართლე ურთმელიძის გადაწყვეტილებას, და რომლის მიხედვითაც რუსთავი 2-ის წილები ქიბარ ხალვაშის კუთვნილებაში გადადის.

ლეიბორისტული პარტიის ლიდერის თქმით, ის ელოდა აღნიშნულს, რადგან დღევანდელ ხელისუფლებას თვითმკვლელობის კურსი აქვს აღებული:

"დემოკრატიულ სამყაროში ყველამ იცის, რომ საზოგადოება არ აპატიებს ფორმალურ თუ არაფორმალურ მმართველს, საკუთარ ჭკუაზე შეცვალოს ტელევიზიის მესაკუთრეები".

ნათელაშვილის თქმით, გადამწყვეტი არაა ის, რომ საქართველო პატარა ქვეყანაა, მისი თქმით, იგივე მოხდებოდა დიდ ქვეყნებშიც:

"პრეზიდენტმა ობამამ CNN-ის ან Fox News-ის სამეურვეო საბჭოს ან მესაკუთრეთა შეცვლა, ეს მისი გადაყენებით და კონგრესში მის წინააღმდეგ იმპიჩმენტის აგორებით დასრულდება".

ლეიბორისტული პარტიის ლიდერმა ბიძინა ივანიშვილს პოლიტიკური გვამი უწოდა, რადგანაც, ნათელაშვილის თქმით, ყოფილმა პრემიერმა არ შეასრულა არცერთი დაპირება რაც საზოგადოებას მისცა, ხოლო რუსთავი 2-ის საქმეზე სასამართლოს გამოყენებით მან საქართველოს ევროპასთან უვიზო მიმოსვლის შანსი დააკარგვინა.

თბილისის სააპელაციო სასამართლომ 10 ივნისს გამოაცხადა თავისი გადაწყვეტილება და ძალაში დატოვა საქალაქო სასამართლოს მოსამართლის, თამაზ ურთმელიძის, გადაწყვეტილება, რომლის მიხედვითაც რუსთავი 2-ის წილები ქიბარ ხალვაშის კუთვნილებაში გადადის.

თბილისის სააპელაციო სასამართლომ რუსთავი 2-ის საქმის განხილვა 7 ივნისს დაასრულა.