ბუნებრივია, ვაგრძელებთ ბრძოლას. არ შეგვიწყვეტია სამართლებრივი ბრძოლა ამ გადაწყვეტილების შემდეგ — სხვა მექანიზმებსაც გამოვიყენებთ, რომელიც საბოლოოდ მიიყვანეს ქვეყანას იქამდე, რომ რუსული კანონი უპირობოდ იქნება გაუქმებული, — ასე გამოეხმაურა საქართველოს ახალგაზრდა იურისტთა ასოციაციის თავმჯდომარე, ნონა ქურდოვანიძე საკონსტიტუციო სასამართლოს გადაწყვეტილებას რუსულ კანონთან დაკავშირებით მიღებულ გადაწყვეტილებაზე.

"საკონსტიტუციო სასამართლოს მიერ მიღებული ის გადაწყვეტილება, რომელიც გუშინ გამოცხადდა პრობლემურია. ჩვენ ვითხოვდით და ვასაბუთებდით, რომ საკონსტიტუციო სასამართლოს უნდა შეეჩერებინა რუსული კანონის შესაბამისი მუხლების მოქმედება. ეს არ გააკეთეს. საკონსტიტუციო სასამართლოს ისტორიული შანსი ჰქონდა, გადაწყვეტილებით უარი ეთქვა ამ კანონზე და მისი შეჩერებით პოზიტიური როლი შეესრულებინა კანონის გაუქმების პროცესში.

როგორც აღმოჩნდა, საკონსტიტუციო სასამართლოს უმრავლესობამ მიიღო ის გადაწყვეტილება, რაც მიიღო. ბუნებრივია, ვაგრძელებთ ბრძოლას, არ შეგვიწყვეტია სამართლებრივი ბრძოლა ამ გადაწყვეტილების შემდეგ. ეს საქმე საკონსტიტუციო სასამართლოში გრძელდება, ის განიხილება არსებითად, მოხდება შეფასება კონსტიტუციას ეწინააღმდეგება თუ არა ზოგადად ნორმები, მანამდე განიხილებოდა შეჩერდეს თუ — არა. ჩვენ, ცხადია, სხვა მექანიზმებსაც გამოვიყენებთ, რომელიც საბოლოოდ მიიყვანეს ქვეყანას იქამდე, რომ რუსული კანონი უპირობოდ იქნება გაუქმებული", — განაცხადა ქურდოვანიძემ.