ოსკაროსანმა მსახიობმა ჰოლი ბერიმ ცოტა ხნის წინ შოკისმომგვრელი განცხადება გააკეთა.

ერთ-ერთ ინტერვიუში, რომელშიც ბერი საკუთარი კარიერისა და ვარსკვლავური გზის შესახებ საუბრობდა, აღიარა, რომ წლების წინ უსახლკაროთა თავშესაფარში ცხოვრობდა.

"ჩემი გზა ძალიან გრძელი და რთული იყო", ამბობს ჰოლი ბერი.

ოსკაროსანი მსახიობი იხსენებს წლებს, როდესაც ის ნიუ-იორკში პირველად ჩამოვიდა.

"როდესაც ნიუ-იორკში საცხოვრებლად მარტო წავედი, შეიძლება ითქვას, რომ ფული საერთოდ არ მქონდა. მახსოვს, ერთხელ დედას დავურეკე და ფულის გამოგზავნა ვთხოვე, მაგრამ უარი მითხრა, მაშინ ძალიან გავბრაზდი და მეწყინა, ახლა კი ამის გამო მისი მადლიერი ვარ, რადგან ამ საქციელით მან ერთადერთი სწორი გზა დამანახა. მან მითხრა, რომ თუ მსახიობობა ჩემი ნამდვილი მისწრაფება იყო, ამ პრობლემას თავად გავუმკლავდებოდი. მირჩია, მემუშავა ნებისმიერ ადგილას, რათა საკუთარი ფული გამომემუშავებინა, ხოლო როდესაც მოვძლიერდებოდი, მსახიობი გავმხდარიყავი. ასეც მოვიქეცი, არასდროს მითქვამს, მაგრამ წლების წინ იყო დრო, როდესაც უსახლკაროთა თავშესაფარშიც კი ვცხოვრობდი, შემდეგ გავხდი ბარმენი, გავიარე რთული გზა და საბოლოოდ პირველი როლიც მივიღე სერიალში", იხსენებს ჰოლი ბერი.

შეგახსენებთ, რომ ბერი ამ დრომდე ერთადერთი შავკანიანი მსახიობი ქალია, რომელმაც 2002 წელს საუკეთესო მსახიობი ქალის ნომინაციაში ოსკარი მიიღო.