ირანის სულიერმა ლიდერმა, აიათოლა ალი ხამენეიმ მუსლიმებს ჰეზბოლას გვერდით დგომისკენ და ისრაელის წინააღმდეგ ბრძოლისკენ მოუწოდა.

განცხადებაში, რომელიც ისრაელის თავდაცვის ძალების მიერ ჰეზბოლას ლიდერის, ჰასან ნასრალას, ლიკვიდაციის შესახებ გავრცელებულ ცნობებს მოჰყვა, ხამენეი აღნიშნავს, რომ რეგიონის ბედს წინააღმდეგობა გადაწყვეტს, რომლის წინა ხაზზეც ჰეზბოლა იბრძვის.

ბეირუთში ჰეზბოლას ცენტრალურ შტაბზე თავდასხმის შემდეგ, რომელსაც, ისრაელის არმიის ცნობით, ჰასან ნასრალა შეეწირა, ალი ხამენეი უსაფრთხო ადგილას გადაიყვანეს.

The Jerusalem Post-ის ცნობით, ირანი მუდმივ კონტაქტზეა ჰეზბოლასთან მას შემდეგ, რაც ნასრალას დაღუპვის ცნობები გავრცელდა. მასთან ერთად, ისრაელის არმიის განცხადებით, დაიღუპა სამხრეთის ფრონტის მეთაური ალი კარაკიც.