"ხელისუფლება ცდილობს დაატეროროს არა მხოლოდ საზოგადოების თითოეული წევრი, ხელში ჩაიგდოს ის ინსტიტუციები, რომლებიც ჯერ კიდევ თავისუფალია — არა მხოლოდ ილიას უნივერსიტეტი, არამედ მთლიანად უმაღლესი განათლების სფერო", — ამის შესახებ განათლების ექსპერტმა და ილიას სახელმწიფო უნივერსიტეტის პროფესორმა სიმონ ჯანაშიამ მას შემდეგ განცხადება, რაც მიმდინარე წლის 26 სექტემბერს, ავტორიზაციის საბჭომ, ილიას უნივერსიტეტს პირობითი ავტორიზაცია მისცა.

მისი თქმით, ილიას უნივერსიტეტს დადებითი დასკვნები ჰქონდა, მაგრამ ავტორიზაციის საბჭომ გადაწყვიტა, რომ უნივერსიტეტი ვერ აკმაყოფილებს მოთხოვნებს.

"გუშინ ილიას უნივერსიტეტს პირობითი ავტორიზაცია მისცეს. მიუხედავად იმისა, რომ ილიას უნივერსიტეტს ჰქონდა ყველა დადებითი დასკვნა, ყველა მიმართულებით, ავტორიზაციის საბჭომ გადაწყვიტა, რომ უნივერსიტეტი ვერ აკმაყოფილებს ავტორიზაციის მოთხოვნებს და დამსწრე საზოგადოებას უთხრეს, რომ ილიაუნი მიიღებს პირობით აკრედიტაციას და ერთი წლის შემდეგ გაივლის ხელახალ ავტორიზაციას და მერე გაირკვევა აკმაყოფილებს თუ არა მოთხოვნებს“, — აცხადებს სიმონ ჯანაშია.

ილიაუნის პროფესორის თქმით, როცა საბჭოს მოვალეობის შემსრულებელ ზურაბ ორჯონიკიძეს სთხოვეს განემარტათ აღნიშნული გადაწყვეტილების მიზეზი, მან უპასუხა, რომ "არაა ვალდებული განუმარტოს საზოგადოებას, საბჭო რატომ იქცევა ისე, როგორც იქცევა".

"როცა სთხოვეს განემარტათ გადაწყვეტილების მიზეზი, საბჭოს მოვალეობის შემსრულებელმა ზურაბ ორჯონიკიძემ თქვა, რომ უნდა გასულიყო. ის გარეთ მოეთათბირა ვიღაცას, შემდეგ დაბრუნდა და განაცხადა რომ არაა ვალდებული განუმარტოს საზოგადოებას — რატომ იქცევა ისე, როგორც იქცევა. ვერ მივიღეთ პასუხი რას ეფუძნებოდა ეს გადაწყვეტილება. მიუხედავად იმისა, რომ ექსპერტები ამბობდნენ, რომ ყველაფერი წესრიგშია", — ამბობს სიმონ ჯანაშია.

სიმონ ჯანაშია ავტორიზაციის საბჭოს გადაწყვეტილებას ილიაუნისთვის პირობითი ავტორიზაციის მიღების შესახებ ილიაუნის სტუდენტებისა და პროფესორ-მასწავლებლების პოლიტიკურ აქტიურობას უკავშირებს. მისი თქმით, რუსული კანონის ინიციირებიდან მოყოლებული, ილიაუნის სტუდენტები და პროფესორ-მასწავლებლები აქტიურად აპროტესტებდნენ კანონს, რასაც რექტორებისთვის ხელწერილების დაწერა და ავტორიზაციის შეჩერების მუქარა მოჰყვა.

"შარშან, როცა პირველად გამოიტანეს რუსული კანონი, ილიას უნივერსიტეტი სტუდენტები ძალიან აქტიურობდნენ. როცა ჩამოვიდა გერმანიის საგარეო საქმეთა მინისტრი, ერთ-ერთ ყველაზე მნიშვნელოვანი შეხვედრა ჰქონდა ილიას უნივერსიტეტში. იმ შეხვედრაზე ხელისუფლება არ მიიწვიეს. ამისი შემდეგ, ხელისუფლებამ დაიწყო ილიას უნივერსიტეტზე შეტევა, მიუქსიეს ახალგაზრდები რექტორს და დააბრალეს, რომ პანდემიის პერიოდში მან ზედმეტად ცოტა ფული დახარჯა საწვავზე. მეორედ როცა გამოიტანეს რუსული კანონი, მაშინაც აქტიურობდნენ სტუდენტები. მათ პროფესორების ნაწილმაც ღიად გამოუცხადა მხარდაჭერა იმით, რომ უთხრეს — შეგიძლიათ ლექციები გააცდინოთ და მერე აგინაზღაურებთო. რასაც მოჰყვა ის, რომ სამინისტრომ შეკრიბა რექტორების საბჭო, დააწერინა წერილი, სადაც უნივერსიტეტები თითქოს ემიჯნებოდნენ პოლიტიკას. ამ წერილს ილიას უნივერსიტეტის რექტორმა არ მოაწერა ხელი. მეორე რაც მოხდა იყო ის, რომ განათლების სამინისტრომ, ხარისხის განვითარების ცენტრის თანამშრომლების გვერდის ავლით, გამოაქვეყნა განცხადება, რომლითაც დაემუქრა უნივერსიტეტებს, რომ პრობლემები შეექმნებოდათ ავტორიზაციის პროცესში და ამ მუქარას ასრულებს სახელმწიფო", — აცხადებს სიმონ ჯანაშია.