სახალხო დამცველმა, ლევან იოსელიანმა, პარლამენტთან მოშიმშილე შუქრუთის მოსხლეობა მოინახულა.

შუქრუთელებმა აუხსნეს იოსელიანს, რომ შეზღუდული აქვთ უფლებები და მათ შორის, პროტესტის და გამოხატვის უფლება.

"25 დღეა, ვშიმშილობთ და პირველად მოხვედით, რაის სახალხო დამცველი ხართ, პატივცემულო?" – მიმართეს იოსელიანს პარლამენტის წინ მყოფმა პროტესტის მონაწილეებმა.

პროტესტის ერთ-ერთმა მონაწილე გიორგი ნეფარიძემ სახალხო დამცველს ჯორჯიან მანგანეზთან მიმდინარე უთანხმოების ამბები გააცნო.

ნეფარიძის კითხვა, თუ კონკრეტული კომპანიის ქმედებების გამო ადამიანების სიცოცხლეს და ჯანმრთელობას საფრთხე ექმნება, რა ბერკეტი აქვს სახალხო დამცველს, იოსელიანმა უპასუხა, რომ ეს თემა მას არ ეხება და საქმის შესასწავლად ომბუდსმენის ოფისს უნდა მიმართონ.

იოსელიანმა შუქრუთელებს სამართლებლივი საქმის შეფასების მოსამზადებლად დოკუმენტაციის მიტანა სთხოვა და განმარტა, რომ პროტესტის მონაწილეებს კარვის გაშლის ნებართვის მიცემაზე განცხადება გაავრცელა და შსს-საც მიმართა.

“მე მათ ავუხსენი კიდევ ერთხელ, მთელი ამ პერიოდის მანძილზე გვქონდა კომუნიკაცია მათ ადვოკატებთან, ვთხოვდით, წარმოედგინათ დოკუმენტაცია, რათა შევძლოთ მათი საკითხის შესწავლა. დღემდე, სამწუხაროდ, არაფერია წარმოდგენილი, დღეს კიდევ ერთხელ ვთხოვე და დამპირდნენ, რომ შემოიტანენ იმ საბუთებს, რაც ადასტურებს მათ პრეტენზიებს – სამსახურიდან უსაფუძვლოდ გათავისუფლებას, პროტესტის გამოხატვის უფლებაში ჩარევას და ა.შ.

მინდა, საზოგადოებასაც განვუმარტო, რომ არის საკითხები, რომელშიც სახალხო დამცველი ვერ ჩაერევა, არაა ჩვენი კომპეტენცია. კომპენსაციის საკითხი, რომელიც არის მათი ერთ-ერთი მოთხოვნა, სასამართლოს გადასაწყვეტია. სხვა საკითხები, რაც დაკავშირებულია საპროცესო უფლებამოსილებასთან, გამოხატვის თავისუფლებასთან, არის ჩვენი მანდატი და კიდევ ერთხელ ვთხოვე, მოგვაწოდონ ინფორმაცია, რომ შევძლოთ შესწავლა. რამდენჯერმე მათ ადვოკატებთან კონტაქტისა, არაფერი წარმოდგენილი არ იყო და ჩვენ ვერ შევისწავლიდით”, — უთხრა იოსელიანმა პუბლიკას

პროტესტის მონაწილეებმა ომბუდსმენთან გამოხატეს პრეტენზია, იმის თაობაზე, რომ 7თვიანი პროტესტის განმავლობაში, მხოლოდ ახლა მივიდა პირველად. იოსელიანმა უპასუხა, რომ მისი წარმომადგენლები პარლამენტთან და შუქრუთშიც იყვნენ. მან გაიმეორა, რომ ადვოკატებთან კვლავ აქვს კონტაქტი.

“გუშინ დამირეკა ერთ-ერთმა, მთხოვა, პირადად თქვენ გვინდა რომ მოხვიდეთო და როგორც კი დამირეკეს, მაშინვე მოვედი, მაგრამ ჩემი მოსვლა ვერ გადაწყვეტს ამ საკითხს, ამაშია საქმე. ყურადღებას ვაქცევთ, კარვის შემთხვევაში განცხადებაც გავავრცელეთ. ჩვენი თანამშრომლები მოდიან, პერიოდულად ინტერესდებიან მათი მდგომარეობით, ოღონდ ამაზე მეტის გაკეთება ამ ეტაპზე არ შეგვიძლია, გარდა იმ სამართლებრივი პროცედურებისა, რაც ჩვენი მანდატით შეგვიძლია, თუ წარმოადგენენ დოკუმენტაციას. ყალბ მოლოდინს ვერავის ვერ შევუქმნი, მით უმეტეს, ადამიანებს, რომლებიც შიმშილობენ“, – განაცხადა მან.

პროტესტის ერთ-ერთმა მონაწილემ, გიორგი ნეფარიძემ, ანახა, რომ ყველა დოკუმენტი სახალხო დამცველს უკვე აქვს.

„თუ რამე დოკუმენტაცია არსებობს, ყველანაირ დოკუმენტაციასთან წვდომა აქვს ბატონ ლევან იოსელიანს, აქ მოსვლის და მასთან საუბრის შემდგომ დაგვრჩა იმის განცდა, რომ თავად ბატონი ლევან იოსელიანის უფლებები არაა დაცული და შეზღუდულია მაგ ადამიანის უფლებები და სუფთა ადამიანურად შეგვეცოდა ბატონი ლევან იოსელიანი“, – უთხრა ნეფარიძემ პუბლიკას.

ცნობისთვის, შუქრუთელები პროტესტს თბილისში, პარლამენტის წინ 11 სექტემბრიდან აგრძელებენ. 19 სექტემბერს, მთავრობის კანცელარიაში ირაკლი კობახიძესთან მოთხოვნის წერილი შეიტანეს. პასუხი ამ ეტაპზეც არ არის.

მოსახლეობა "ჯორჯიან მანგანეზის" საქმიანობის შედეგად გარემოსა და საცხოვრებელ სახლებზე მიყენებულ ზიანს აპროტესტებს. მათი თხოვნაა, რომ ცენტრალური ხელისუფლება პროცესში ჩაერთოს იმისთვის, რომ კომპანიამ მათთან აღებული ვალდებულებები შეასრულოს.

ადგილობრივები აღნიშნავენ, რომ კომპანიის მიერ მადნის ღია კარიერული მოპოვების შედეგად, მნიშვნელოვანი ზიანი მიადგა გარემოს, დაზიანდა საცხოვრებელი სახლები, ეკლესია და სასაფლაოები.

აქციის მონაწილეები მოითხოვენ, რომ კომპანიამ შეასრულოს ვალდებულებები, რომელიც 2021 წლის შეთანხმებით აქვს აღებული. კერძოდ, პროტესტის მონაწილეები მაღაროების მუშაობის გაჩერებასა და კომპენსაციების გაცემას მოითხოვენ.