რუსეთის საგარეო საქმეთა სამინისტროს წარმომადგენელი, მარია ზახაროვა, უკრაინის კონფლიქტის ჭრილში მიმდინარე საკვების უსაფრთხოების კონფერენციაზე სომხეთის წარმომადგენლის დასწრებას გამაფრთხილებელი განცხადებით გამოეხმაურა და სომხეთი ფორუმში მონაწილეობის გამო გააკრიტიკა.

ზახაროვამ ხაზი გაუსვა გარემოებას, რომ სომხეთის მარცვლეულის იმპორტის 90% რუსეთზე მოდის, ამიტომ ასეთ საკითხებზე სომხეთი სწორედ მათ უნდა ელაპარაკოს და არა დასავლეთს.

"იქნებ, უკეთესი ყოფილიყო, ონლაინ კონფერენციით თქვენი საკვების უსაფრთხოების განსახილველად რუსეთს დაჰკავშირებოდით? ეს ღირსეული საქციელი იქნებოდა. რატომ უნდა ჩაერთოთ თაღლითობაში იმის ზურგს უკან, ვინც გაჭმევთ და თქვენი საკვების უსაფრთხოებაზე ზრუნავს?", — განაცხადა მარია ზახაროვამ

კონფერენციაში სომხეთის უშიშროების საბჭოს მდივანი, არმენ გრიგორიანი, მონაწილეობას დისტანციურად იღებდა. გრიგორიანი უკრაინის ომის სამშვიდობო პროცესთან დაკავშირებით შვეიცარიაში მიმდინარე სამშვიდობო სამიტსაც დაესწრო, რამაც ორ ქვეყანას შორის ისედაც დაძაბული ურთიერთობა უფრო გაამწვავა.

გასული ერთი წლის განმავლობაში რუსეთისა და, მისი ტრადიციული მოკავშირე, სომხეთის ურთიერთობები საგრძნობლად გაუარესდა — სომხეთი აქტიურად ცდილობს, შეამციროს ეკონომიკური დამოკიდებულება რუსეთზე და კავშირები დასავლეთთან დაამყაროს. მეტიც, 2023 წელს სომხეთიდან უკრაინაში პირველი ჰუმანიტარული დახმარება გაიგზავნა, ხოლო 2024 წლის ივნისში ბუჩაში სომხური დელეგაციაც კი ჩავიდა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.