საქართველოში გამოიცა პირველი ორფირფიტიანი კრებული სერიიდან — გია ყანჩელი — მუსიკა სცენისა და ეკრანისთვის (Giya Kancheli — Music For Stage & Screen). ფირფიტები მუსიკალურმა ლეიბლმა Tbilisi Records-მა გამოსცა. ის მოიცავს ავტორის ადრეული ნამუშევრების ორიგინალ ჩანაწერებს: მუსიკას სპექტაკლებისთვის ხანუმა (1968), ჩალის ქუდი (1966) და კომპოზიტორის ერთ-ერთ პირველ საუნდტრეკს ფილმისთვის არაჩვეულებრივი გამოფენა (1968).

ფოტო: კომპოზიტორის ოჯახის პირადი არქივიდან

ამ ვინილის ფირფიტებში შესულია საარქივო ჩანაწერები, როგორც მანამდე გამოუქვეყნებელი მუსიკის, ისე ყველასთვის საყვარელი მელოდიებისა და ნაცნობი კომპოზიციების ალტერნატიული ვერსიები, რომლებიც მსმენელისთვის პირველად ხდება ხელმისაწვდომი. კომპოზიტორის კარიერის ადრეული პერიოდის ეს ნიმუშები წარმოაჩენს მის უკვე ჩამოყალიბებულ სტილს და საფუძველს ქმნის გვიანდელი ნამუშევრებისა და შემოქმედებითი ევოლუციის შესაფასებლად. Giya Kancheli — Music For Stage & Screen VOL1 ასევე ხაზს უსვამს კომპოზიტორის განსაკუთრებულ უნარს კოლაბორაციისა, რაც მას საკვანძო ფიგურად აქცევს იმ ხელოვანთა შორის, რომლებმაც განსაზღვრეს საქართველოს შემოქმედებითი ისტორია.

ფოტო: კომპოზიტორის ოჯახის პირადი არქივიდან

გია ყანჩელი (1935-2019) XX საუკუნის უდიდესი ქართველი კომპოზიტორია. მან შექმნა ცნობილი სიმფონიური და კამერული ნაწარმოებები, თუმცა, იმავდროულად, საკუთარი კომპოზიციებით სიღრმე და სილამაზე შემატა ქართულ თეატრსა და კინოს. რეჟისორებთან, სცენარისტებთან, დრამატურგებთან და დირიჟორებთან მჭიდრო თანამშრომლობით, ყანჩელმა ხელი შეუწყო საქართველოს მრავალფეროვანი, მულტიდისციპლინური შემოქმედებითი იდენტობის ფორმირებას.

ფოტო: კომპოზიტორის ოჯახის პირადი არქივიდან

მუსიკალური ლეიბლი Tbilisi Records შექმნილია ქართული Vodkast Records-ის გუნდის მიერ. Vodkast Records აერთიანებს ვინილის ფირფიტებისა და HiFi აუდიოტექნიკის მაღაზიებს თბილისში, ბათუმსა და ონლაინ, ასევე წარმოადგენს მუსიკალურ ლეიბლს, ივენთების სერიას და პოდკასტს.


Tbilisi Records: ლეიბლი დიდ მადლობას უხდის გია ყანჩელის ოჯახს ნდობისა და მხარდაჭერისთვის. ასევე მადლობა ყველა იმ ადამიანს, ვინც საკუთარი წვლილი შეიტანა ამ გამოცემის შექმნაში – მუსიკოსებსა და ფოტოგრაფებს, რომელთა სახელებიც, შესაძლოა, დროთა განმავლობაში დაიკარგა, თუმცა მათი შემოქმედება მუდმივად იცოცხლობს მუსიკასა და ფოტოებში.

ფოტო: დიზაინი: სანდრო თავართქილაძე

გამოცემის შეძენა ვინილის ფირფიტებზე უკვე შესაძლებელია, როგორც Vodkast Records-ის ფიზიკურ მაღაზიებში თბილისსა და ბათუმში, ასევე Vodkast Records-ის ინტერნეტ მაღაზიაში. ამავე წლის 9 ივნისიდან ხელმისაწვდომი იქნება ფირფიტების მსოფლიოს სხვადასხვა მაღაზიაში.