საფრთხეების მინიმუმამდე შემცირების მიზნით, უკრაინის ეროვნული უსაფრთხოებისა და თავდაცვის საბჭომ, ოფიციალურ პირებს, სამხედრო პერსონალს, უსაფრთხოებისა და თავდაცვის სექტორის თანამშრომლებსა და კრიტიკული ინფრასტრუქტურის ოპერატორ საწარმოებს Telegram-ის გამოყენება აუკრძალა.

საბჭოს განცხადებაში წერია, რომ გამონაკლისი მხოლოდ იმ თანამშრომლებზე ვრცელდება, რომელთა მუშაობაც შეტყობინებების აპლიკაციის გამოყენებასთანაა დაკავშირებული.

უკრაინის უშიშროებისა და უკრაინის არმიის გენერალური შტაბის წარმომადგენლების თქმით, რუსეთი შეტყობინებების აპლიკაციას სახელმწიფოსთვის საფრთხის შემცველი მიზნებით იყენებს, როგორიცაა, კიბერშეტევა, მომხმარებლის გეოლოკაციის დადგენა და სარაკეტო დარტყმების კორექტირება.

უკრაინის სამხედრო დაზვერვის ხელმძღვანელმა, კირილო ბუდანოვმა ეროვნული უსაფრთხოების საკოორდინაციო ცენტრის შეხვედრაზე თქვა, რომ არის ვარაუდი, რომ რუსულ სპეცსამსახურებს წვდომა აქვთ შეტყობინებების აპლიკაციების მომხმარებლების პირად მიმოწერაზე, მათ პირად მონაცემებსა და წაშლილ შეტყობინებებზე.

სოციალური ქსელი Telegram, რომელიც ხშირად გამოიყენება, როგორც ერთ-ერთი უსაფრთხო საკონტაქტო აპლიკაცია, რუსმა ძმებმა პაველ და ნიკოლაი დუროვებმა 2013 წელს რუსეთში შექმნეს. 2024 წლის 24 აგვისტოს, პაველ დუროვი საფრანგეთის ერთ-ერთ აეროპორტში, სხვადასხვა ბრალდების გამო დააკავეს. პაველ დუროვი 28 აგვისტოს, 5.56 მილიონი დოლარის გირაოთი გაათავისუფლეს.