საზოგადოებრივი მაუწყებელსა და მის თანამშრომლებს შორის შეხვედრის შემდეგ გადაწყდა, რომ მოლაპარაკების მიღწევის შემთხვევაში, არხის 500-მდე თანამშრომელს ხელფასებს გაუზრდიან. ამის შესახებ On.ge-ს არხის ჟურნალისტმა, ლაშამ მესხმა განუცხადა და განმარტა, რომ აღნიშნული მოლაპარაკება არაოფიციალური ხასიათისაა, მისი მორიგი რაუნდი კი შემდეგ კვირას გაიმართება:

"აღნიშნული შედეგი პირველადი პროფკავშირის პროტესტის შედეგად შესაძლოა უახლოეს მომავალში დადგეს".

მესხმა განმარტა, რომ კონფიდენციალობიდან გამომდინარე ზუსტ პროცენტსა და თანხებზე ამ ეტპაზე ვერ ისაუბრებს. მისი თქმით, ამ დროისთვის უცნობია, წარმატებით დასრულდება თუ არა მოლაპარაკება.

კონკრეტულად რაზე შეთანხმდნენ მხარეები, ამის შესახებ საზოგადოებრივი მაუწყებლის წარმომადგენელმა, თიკო ბერძენიშვილმა გვიპასუხა, რომ ვინაიდან მოლაპარაკებები ჯერ არ დასრულებულა და ამასთან, ურთიერთშეთანხმების თანახმად, მის დასრულებამდე ნებისმიერი ინფორმაცია ამ საკითხთან დაკავშირებით კონფიდენციალურია, კონკრეტულ პასუხს ვერ გაგვცემდა.

ამასთან ბერძენიშვილმა განგვიცხადა, რომ პროცესში უშუალოდ ჩართული იყო არხის გენერალური დირექტორი, გიორგი ბარათაშვილი, რომელსაც ყველაზე მეტად შეუძლია კომპეტენტური პასუხის გაცემა. თუმცა, On.ge-მ ბარათაშვილთან დაკავშირება ჯერჯერობით ვერ შეძლო.

გუშინდელი შეხვედრა საზოგადოებრივი მაუწყებლის თანამშრომლებს, ბორდის წარმომადგენლებსა და დეპარტამენტების უფროსებს შორის 6 საათის განმავლობაში მიმდინარეობდა.

საზოგადოებრივი მაუწყებლის თანამშრომელთა ნაწილმა, რომელთა შორის არიან მოამბის ჟურნალისტები, მემონტაჟეები და ტექნიკური პერსონალი, 18 მაისს, მაუწყებლის წინ გამაფრთხილებელი აქცია გამართა. ისინი მაუწყებლისგან სამუშაო პირობების გაუმჯობესებასა და ხელფასების მომატებას ითხოვდნენ.