ცნობილი ამერიკელ-სომეხ ჟურნალისტ არსენ ხარატიანს თბილისში არ უშვებენ. ჟურნალისტის ახლო მეგობარმა რადიო თავისუფლებას უთხრა, რომ ის აეროპორტში დაახლოებით დილის 4 საათიდან ჰყავთ დაყოვნებული. იმავე წყაროს ინფორმაციით, ხარატიანი ლუქსემბურგიდან თბილისში ბრუნდებოდა.

"ახლა მაქვს დოკუმენტი, რომელშიც უარს მეუბნებიან ქვეყანაში შემოსვლაზე. მაქვს პასპორტში შტამპი, რომელმაც ქვეყანაში შემოსვლის უფლება მომცა. ასე რომ, არ ვიცი რომელია უფრო ლეგალური", — წერს ხარატიანი სოციალურ ქსელ Facebook-ზე.

ხარატიანის საზღვარზე დაკავების ოფიციალური მოტივი უცნობია. ფორმულას ცნობით, ბიძინა ივანიშვილს ჰქონდა ინფორმაცია, რომ ჟურნალისტი საქართველოში ტელევიზიის გახსნას აპირებდა.

ხარატიანი ფაშინიანის ყოფილი მრჩეველიცაა და არასამთავრობო ორგანიზაციას წარმოადგენს. იგი ხშირად სტუმრობს საქართველოს, აშშ-ს, სომხეთსა და ევროპის სხვა ქვეყნებს.