ირანის პრეზიდენტი მასუდ პეზეშკიანი ყაზანში BRICS-ის სამიტში მიიღებს მონაწილეობას. ამის შესახებ რუსეთში ირანის ელჩმა კაზემ ჯალალიმ განაცხადა. ინფორმაციას რუსული მედია ავრცელებს.

14 სექტემბერს ცნობილი გახდა, რომ ღონისძიებას ბრაზილიის პრეზიდენტი ლულა ინასიო და სილვაც დაესწრება.

14 სექტემბერს რუსეთის ფედერაციის საგარეო საქმეთა სამინისტროს ოფიციალურმა წარმომადგენელმა მარია ზახაროვამ განაცხადა, რომ BRICS-ის სამიტი, რომელიც 22-დან 24 ოქტომბრამდე ყაზანში გაიმართება, მსოფლიო სენსაცია გახდება.

რუსეთის საგარეო საქმეთა სამინისტროს წარმომადგენელმა აღნიშნა, რომ დღემდე რუსეთის ფედერაციამ, როგორც BRICS-ის თავმჯდომარემ, უკვე გამართა 150-ზე მეტი ღონისძიება სხვადასხვა დონეზე. თუმცა, ცენტრალური ღონისძიება თათრეთის რესპუბლიკის დედაქალაქში, ყაზანში იქნება.

BRICS ბრაზილიის, რუსეთის, ინდოეთის, ჩინეთისა და სამხრეთ აფრიკის აბრევიატურაა, რამდენიმე უმსხვილეს ეკონომიკას მოიცავს. მან ოთხი ახალი წევრი მიიღო ამ წლის დასაწყისში — ირანი, არაბთა გაერთიანებული საამიროები, ეთიოპია და ეგვიპტე. საუდის არაბეთი მიწვეული იყო გასაწევრიანებლად, თუმცა სამეფო ამ ნაბიჯისთვის მზად არაა.

Bloomberg-ის ცნობით, ჯგუფის შემდგომი გაფართოება შეიძლება მოხდეს 22-24 ოქტომბერს, ყაზანში, სამიტზე. მალაიზია, ტაილანდი, თურქეთი და აზერბაიჯანი იმ ქვეყნებს შორის არიან, რომლებიც BRICS-ში აპირებენ გაწევრიანებას.