HBO-ს სერიალი, სამეფო კარის თამაშები, სხვადასხვა მიზეზთა გამო ყოველთვის ხვდება ყურადღების ცენტრში. ძირითადად, ეს შოუს სიუჟეტი და იქ განვითარებული მოვლენებია.

არანაკლებ დიდ ყურადღებას იქცევს სერიალის ისეთი დეტალები, როგორებიც არის დეკორაცია, რეკვიზიტები და კოსტიუმები.

ყველამ, ვინც სამეფო კარის თამაშებს უყურებს, იცის, რომ ამ შოუს კოსტიუმებმა მთლიანად შეცვალა ტელევიზია - იმდენად, რომ შოუს კოსტიუმების დიზაინერი, მიშელ კლაპტონი სერიალის გამოსვლიდან ყოველ წელს ნომინირებული იყო ემიზე და ორჯერ მოიგო კიდეც.

როგორც ცნობილია, სერიალის კოსტიუმები წიგნში აღწერილ დიზაინზე არ არის დაფუძნებული და შოუში განსხვავებული დიზაინის შექმნის მიზეზი ხშირი გეოგრაფიული ცვალებადობაა. ცნობილია ისიც, რომ კოსტიუმის ფერი დიდ როლს თამაშობს პერსონაჟის განვითარებაში.

ცოტა ხნის წინ კი სერიალის კოსტიუმების დიზაინერმა, მიშელ კლაპტონმა თქვა, რომ სამეფო კარის თამაშების რამდენიმე პერსონაჟის მოსასხამს IKEA-ს ხალიჩებისგან კერავს.

როგორც კლაპტონი ამბობს, იკეას ხალიჩებისგან ძირითადად ღამის გუშაგების ტანისამოსი იკერება.

"ჯონ სნოუს ბეწვიანი მოსასხამისთვის იკეას ხალიჩებს ვიყენებთ. თუმცა, რა თქმა უნდა, არა პირვანდელი სახით, ისინი სერიალისთვის სპეციალურად მუშავდება, რათა ძველის იერი ჰქონდეს", ამბობს მიშელი.