უკრაინის საგარეო საქმეთა მინისტრის თანამდებობას ანდრიი სიბიჰა დაიკავებს, — ამის შესახებ ინფორმაციას ამერიკული გამოცემა Bloomberg ავრცელებს.

ანდრიი სიბიჰა, საგარეო საქმეთა ყოფილ მინისტრს, დმიტრო კულებას ჩაანაცვლებს, რომელიც თანამდებობიდან დღეს, 4 სექტემბერს გადადგა. სიბიჰას დანიშვნის შესახებ ოფიციალურ გადაწყვეტილებას უმაღლესი რადა, სავარაუდოდ, ხვალ, 5 სექტემბერს გამოაცხადებს.

სიბიჰა აქამდე უკრაინის საგარეო უწყებაში მინისტრ კულებას პირველი მოადგილის თანამდებობას იკავებდა. როგორც სააგენტო წერს, მას გამოცდილი დიპლომატის რეპუტაცია აქვს. ანდრიი სიბიჰა მიმდინარე წელს საგარეო საქმეთა სამინისტროში მუშაობის დაწყებამდე, სხვადასხვა პერიოდში თურქეთში უკრაინის ელჩისა და უკრაინის პრეზიდენტის, ვოლოდიმირ ზელენსკის შტაბის ხელმძღვანელის მოადგილის თანამდებობებს იკავებდა.

ცნობისთვის, უკრაინის ჯერჯერობით მოქმედმა საგარეო საქმეთა მინისტრმა, დმიტრო კულებამ შესაბამის უწყებაში თანამდებობიდან გადადგომის შესახებ განაცხადი დღეს, 4 სექტემბერს შეიტანა მას შემდეგ, რაც ზელენსკიმ მინისტრთა კაბინეტის საკადრო გადალაგება გამოაცხადა.

კულებას გადადგომის შესახებ ინფორმაცია უმაღლესი რადის თავმჯდომარემ, რუსლან სტეფანჩუკმა გაავრცელა. სტეფანჩუკის თქმით, საგარეო საქმეთა მინისტრის გადადგომას უმაღლესი რადა პლენარულ სხდომაზე მომდევნო ხანებში განიხილავს.