თეთრი ვეშაპი, რომელიც რუსეთის მიერ გაწვრთნილ ჯაშუშად მიიჩნევა, ნორვეგიის სანაპიროზე მკვდარი გამოირიყა.

ძუძუმწოვრის სხეული, რომელსაც ჰვალდიმირს უწოდებენ, ქალაქ რისავიკას სამხრეთ-დასავლეთ ნაწილში ორგანიზაცია Marine Mind-მა იპოვა და გამოსაკვლევად უახლოეს პორტში მიიტანა. Marine Mind ჰვალდიმირის გადაადგილების ტრაექტორიას უკვე წლებია, აკვირდება.

ეს ვეშაპი ნორვეგიის წყლებში პირველად 5 წლის წინ შენიშნეს GoPro-ს კამერით. მას აღკაზმულობა ეკეთა, რომელზეც ფრაზა "სანქტ პეტერბურგის შეიარაღება" ეწერა. სწორედ ამ დეტალმა განაპირობა იმ მოსაზრების გავრცელება, რომ ვეშაპი რუსეთის ჯაშუშია — ექსპერტების თქმით, ასეთი რამ ადრეც მომხდარა. მოსკოვი ამ ბრალდებას არ გამოხმაურებია.

ჰვალდიმირი

ფოტო: Reuters

Marine Mind-ის დამფუძნებლის, სებასტიან სტრანდის თქმით, ვეშაპს დაზიანებები არ აღენიშნება და ამ დრომდე უცნობია მისი სიკვდილის მიზეზი. ჰვალდიმირი 15 წლის იყო, რაც თეთრი ვეშაპისთვის ხანდაზმული ასაკი სულაც არაა — ისინი 60 წლამდე მაინც ცოცხლობენ.

ვეშაპს სახელი "ჰვალდიმირი" ადგილობრივებმა ხუმრობით შეარქვეს. "ჰვალ" ნორვეგიულად ვეშაპს ნიშნავს, ვლადიმირ პუტინის სახელთან მისი შერწყმით კი რუსეთის "ჯაშუშის" სახალისო ზედმეტსახელი შეერქვა.