მსოფლიოში ქვიარ ადამიანებს ყოველთვის ჰქონდათ საიდუმლო კოდი, რომლითაც ერთმანეთს ატყობინებდნენ რომ ლგბტქ თემის წარმომადგენლები იყვნენ, ისე, რომ ეს ჰომოფობებს ვერ გაეგოთ.
1980-იან წლებში აშშ-ის საზღვაო საგამოძიებო სამსახურმა სამძებრო სამუშაოები ჩაატარა იმ ქალის მოსაძებნად, რომელიც რეალურად არც არსებობდა. მათთვის ცნობილი გახდა, რომ გეი კაცები ზოგჯერ საკუთარ თავს "დოროთის მეგობრებს" უწოდებდნენ და გადაწყვიტეს, მოეძებნათ ქალი, სახელად დოროთი. ისინი ფიქრობდნენ, რომ ასე ფლოტში მომსახურე ქვიარების ამოცნობას შეძლებდნენ.

გასულ ათწლეულებში, აშშ-ში ლგბტქ ადამიანებს იმდენად დევნიდნენ, რომ მათ საკუთარი უსაფრთხოებისთვის შექმნეს ე.წ კოდური სიტყვები და ფრაზები, რათა ერთმანეთში კომუნიკაცია შეძლებოდათ. მაგალითად, გეი კაცები ერთმანეთს ჰკითხავდნენ: "შენ დოროთის მეგობარი ხარ?", იმ შემთხვევაში, თუ კითხვის ადრესატი გეი იყო უპასუხებდა — "დიახ", ხოლო თუ არა, მაშინ პასუხი "ვინ არის დოროთი?" იყო.

და მაინც, საიდან მოდის ფრაზა "დოროთის მეგობარი"?

"დოროთის მეგობარი", სავარაუდოდ, ოზის ჯადოქრის პერსონაჟ დოროთის უნდა უკავშირდებოდეს. ოზის ჯადოქარი გეი კულტურის ძალიან დიდ ნაწილად ითვლება და სწორედ ჯუდი გარლენდის სიკვდილი გახდა სტოუნველის აჯანყების მიზეზი ჰომოფობიის წინააღმდეგ.

თუმცა, ამასთან დაკავშირებით რამდენიმე ჰიპოთეზა არსებობს, ეს ფრაზა შესაძლოა გაცილებით ძველიც იყოს და მას პირდაპირ ფრენკ ბაუმის წიგნების პეროსნაჟამდე მივყავდეთ.

მიუხედავად იმისა, რომ NIS-ის მიერ დოროთის ძებნა აბსურდი იყო, სამწუხაროდ, მათ მაინც დიდს წარმატებას მიაღწიეს ლბგტქ ჯარისკაცების იდენტიფიცირებასა და სამსახურიდან გათავისუფლებაში.

2011 წელს, აშშ-ის კონგრესმა "არ იკითხო, არ თქვა" - წესი მოხსნა, რომლის მიხედვითაც, სამხედროებს უნდა დაემალათ თავიანთი ორიენტაცია, თუ სექსუალურ უმცირესობებს მიეკუთვნებოდნენ, თუმცა ამ წესის გაუქმებამდე დაახლოებით 100 000 ადამიანი გააძევეს ჯარიდან მათი სექსუალური ორიენტაციის გამო.

დღეს ქვიარ ადამიანებს ერთმანეთის გასაცნობად კოდური სიტყვები აღარ სჭირდებათ, თუმცა ფრაზა "დოროთის მეგობარი" მაინც ხშირად ჩნდება ფილმებსა თუ სატელევიზიო შოუებში.