Tesla-ს დამფუძნებელმა ილონ მასკმა უარყო ინფორმაცია იმის შესახებ, რომ ჩეჩნეთის მეთაურს, რამზან კადიროვს ელექტრომობილი Cybertruck აჩუქა.

რამზან კადიროვმა, 17 აგვისტოს, გამოაქვეყნა ვიდეო სადაც განაცხადა, რომ მასკისგან საჩუქრად ელექტრომობილი მიიღო, რომელსაც უკრაინაში რუსეთის მხარეს მებრძოლებს გადასცემს "შესაფერის პირობებში" გამოსაყენებლად.

"მას შესანიშნავი მახასიათებლები აქვს. ამიტომ Cybertruck მალე გაიგზავნება უკრაინაში, რუსეთის ჯარების დასახმარებლად. დარწმუნებული ვარ, რომ ეს "მხეცი" ძალიან გამოადგება ჩვენს ჯარისკაცებს", — დაწერა კადიროვმა.

ჩეჩნეთის ლიდერმა, ილონ მასკს მადლობა გადაუხადა და გროზნოში მიიწვია. მისი თქმით, მას ჩეჩნეთში დახვდებიან როგორც "ყველაზე ძვირფას სტუმარს". კადიროვმა ასევე აღნიშნა, რომ რუსეთის საგარეო სამინისტრო მსგავსი ვიზიტების წინააღმდეგი არ იქნებოდა.

კადიროვმა, Telegram-პოსტი დაასრულა იმით, რომ ის მასკისგან "ახალ ქმნილებებს" ელოდება, რომელიც რუსეთს უკრაინაში ომის დასრულებაში დაეხმარება.

New York Times-ის ჟურნალისტის, სეტ აბრამსონის შეკითხვის საპასუხოდ ილონ მასკმა X-ზე გავრცელებული ინფორმაცია უარყო. ჟურნალისტი მასკს ეკითხებოდა, რით დაიმსახურა ასეთი დიდი "შემოწირულება" ამერიკის მიერ სანქცირებულმა მტერმა, რამზან კადიროვმა.

იმავე დღეს, რამზან კადიროვმა მასკის პასუხის "სქრინშოტი" გააზიარა და მასკ მოუწოდა არ აჰყვეს ყურადღება ჩამორჩენილ, უცოდინარ ადამიანებს და კორუმპირებულ მედიას.

საკითხს ჩრდილოეთ კავკასიელი ანალიტიკოსი და ინდიანას უნივერსიტეტის დოქტორანტი, ჰაროლდ ჩემბერსი გამოეხმაურა. მისი თქმით, კადიროვის თავდაპირველი პოსტი "ტროლინგის" ერთ-ერთი ფორმაა და სარგებლობს იმით, რომ დასავლეთში შესაძლოა მისი სიტყვები სერიოზულად მიიღონ. კადიროვი ამ თემას მსოფლიოს ყურადღების ცენტრში დარჩენისთვის იყენებს.

OC–Media კომენტარისთვის კომპანია Tesla-ს დაუკავშირდა, მაგრამ პასუხი ჯერ არ მიუღია.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.