ამერიკის პროკურატურის ცნობით, მსახიობ მეთიუ პერის გარდაცვალების საქმესთან დაკავშირებით ხუთი ადამიანი დააკავეს.

ხუთშაბათს ლოს-ანჯელესში პრესკონფერენცია ჩატარდა, სადაც პროკურატორის წარმომადგენლებმა ბრალდებულებზე ისაუბრეს. როგორც აღმოჩნდა, გამოძიებამ ნარკოტიკის გამყიდველთა და მომწოდებელთა ქსელი აღმოაჩინა, რომელიც კეტამინს, პოტენციურად სასიკვდილო ნარკოტიკს, ყიდდნენ. პერი სწორედ კეტამინის ზედოზირებით გარდაიცვალა.

ხუთ ბრალდებულს შორის არიან პერის ორი ექიმი, მისი პირადი ასისტენტი და პირი, რომელსაც პროკურატურა "კეტამინის დედოფალს" უწოდებს — ნარკოტიკის მსხვილ გამსაღებელს. ხუთი ბრალდებულიდან სამმა საპროცესო შეთანხმებას მიაღწია.

პროკურორ მარტინ ესტრადას თქმით, ბრალდებულებმა სათავისოდ გამოიყენეს პერის ნარკოდამოკიდებულების პრობლემები. "მათ იცოდნენ, რომ მათი ქმედებები არასწორი იყო," — განაცხადა ესტრადამ.

მეთიუ პერი, რომელიც სერიალ Friends-ში ჩენდლერ ბინგის როლს ასრულებდა, 2023 წლის ოქტომბერში 54 წლის ასაკში გარდაიცვალა.