ისრაელის თავდაცვის სამინისტრო ისრაელელ სამხედრო მოსამსახურეებს, ისრაელში ირანის შეჭრის მუქარის ფონზე, საქართველოსა და აზერბაიჯანის სასწრაფო დატოვებისკენ მოუწოდებს.

ისრაელის სახელმწიფო მედიის, Kan 11-ის ცნობით, ბრძანება შეეხება როგორც წვევამდელებს, ასევე საკონტრაქტო ჯარისკაცებს. შესაბამისი განკარგულება ისრაელის თავდაცვის არმიის მეთაურობამ 11 აგვისტოს, საღამოს გამოსცა.

ისრაელის საელჩომ საქართველოში, OC-Media-ს დაუდასტურა, რომ ისრაელის არმიამ ისრაელელ სამხედრო მოსამსახურეებს საქართველოს დატოვებისკენ მოუწოდა. OC-Media-მ აზერბაიჯანში ისრაელის საელჩოს მიმართა კომენტარისთვის, თუმცა დაკავშირება ვერ მოახერხა.

The Telegraph-ის ცნობით, მიზეზი ორივე ქვეყნის ირანთან სიახლოვეა, აზერბაიჯანს აქვს პირდაპირი საზღვარი ისლამურ რესპუბლიკასთან.

"ორივე ქვეყანა, აზერბაიჯანი და საქართველო, ინარჩუნებენ მეგობრულ ურთიერთობას ირანთან და აქვთ დიდი ირანული თემები", — ციტირებს გამოცემა.

მოგვიანებით, აზერბაიჯანის სახელმწიფო საინფორმაციო სააგენტო Azertac-მა მედიის განვითარების სააგენტოს განცხადება გამოაქვეყნა, გავრცელებული ინფორმაცია უარყო და Kan 11 და The Telegraph "დეზინფორმაციის გავრცელებაში" და "საეჭვო წყაროების მითითებაში" დაადანაშაულა.

საქართველოს, ამ თემასთან დაკავშირებით ოფიციალური კომენტარი არ გაუკეთებია.

ირანი ისრაელს საპასუხო ზომებით დაემუქრა მას შემდეგ, რაც 31 ივლისს თეირანში პალესტინელთა რადიკალური ისლამისტური მოძრაობა, ჰამასის პოლიტიკური ბიუროს ხელმძღვანელი, ისმაილ ჰანიე მოკლეს. ჰამასმა და ირანმა მკვლელობაში ისრაელი დაადანაშაულეს.

The Washington Post-ის ცნობით, ისრაელმა ჰამასის ლიდერის ისმაილ ჰანიეს მკვლელობა აღიარა და ამის შესახებ ვაშინგტონს აცნობა.

მოგვიანებით, ამერიკელმა წყაროებმა განაცხადეს, რომ ირანმა შესაძლოა უარი თქვას თავდაპირველ გეგმებზე.

შეერთებულმა შტატებმა დიპლომატიური წყაროების მეშვეობით გაავრცელა გაფრთხილება, რომ მასიური დარტყმა გაზრდის დაძაბულობას რეგიონში და შექმნის ირანსა და ისრაელს შორის პირდაპირი კონფრონტაციის რისკს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.