კიდევ 10 რამ, რაც შეიძლება ნაციონალების ბრალი იყოს

9 აგვისტოს, ნაშუადღევს, შესვენებაზე თუ ფეისბუქზე შეიჭყიტებოდი, თავზარდამცემი ინფორმაცია დაგხვდებოდა: შეკვეთილის დენდროლოგიურ პარკისთვის ბიძინა ივანიშვილის მიერ შეძენილი ბაობაბის რვავე ხე გამხმარა.

გახმობის მიზეზების ძიებამ კი, არც მეტი, არც ნაკლები, ნაციონალურ მოძრაობამდე მიგვიყვანა. უფრო ზუსტად, დენდროლოგიური პარკის განცხადებაში ნათქვამია, რომ "ჩასაფრებულმა პოლიტიკანებმა და მათ შირმად ქცეულმა ეგრეთ წოდებულმა არასამთავრობო ორგანიზაციებმა იდეოლოგიური ბრძოლის ფრონტი გამართეს ამჯერად აფრიკის კონტინენტზე". ამ ფრონტზე კი ბაობაბის რვა ხე გმირულად დაცემულა.

რადგან ბაობაბების არაფერი გაგვეგება, მათი გახმობის მიზეზების კვლევა ჩვენს სამეცნიერო-ტექნოლოგიურ განყოფილებას გადავულოცეთ, ჩვენ კი დავინტერესდით, ბოლო დროს მომხდარი კიდევ რა ამბები შეიძლება უკავშირდებოდეს ნაციონალურ მოძრაობას, უფრო სწორედ, "კოლექტიურ ნაცმოძრაობას". აი, მაგალითად...

1. კიმ კარდაშიანს რომ ქვეყნის მართვის ამბიციები გაუჩნდა

საფუძვლიანი ეჭვი შეიძლება გვქონდეს, რომ საათივით აწყობილი ქვეყნის დესტაბილიზაციისთვის კოლექტიური ნაცმოძრაობა კიმ კარდაშიანს იყენებს...

2. ბენ აფლეკისა და ჯეილოს გზები რომ იყოფა

ვის არ აწყობს ვარსკვლავური წყვილის ერთად ყოფნა და მშვიდობა? რა თქმა უნდა, გლობალური ომის პარტიას!

3. გლადიატორი 2-ის ტრეილერს რომ ცუდი გამოხმაურება მოჰყვა

კოლექტიური ნაცმოძრაობა საერთაშორისო ასპარეზზე ასე მარტო საქართველოს კი არა, ჩვენი სტრატეგიული პარტნიორის, ძველი რომის რეპუტაციის შელახვასაც შეიძლება ცდილობდეს...

4. ადელმა რომ დიდი პაუზის აღება გადაწყვიტა

შემთხვევით, საქართველოშიც ხომ არ აპირებდა კონცერტის გამართვას Starring Georgia-ის ფარგლებში და მერე Massive Attack-ის მსგავსად გადააფიქრებინეს ქვეყნის მტრებმა? არაფერია გამორიცხული!

5. ანჯელინა ჯოლისა და ბრედ პიტის შვილმა რომ მამის გვარი მოიშორა

აი, ეგ სურს ამ ქვეყანაში ნაციონალურ მოძრაობას — შვილებმა მამების გვარებზე უარი თქვან!

6. შრეკი რომ ბრუნდება

ფოტო: Paramount/Courtesy Everett Collection

ასე სურს კოლექტიურ ნაცმოძრაობას ქვეყნის ჭაობში დაბრუნებაც!

7. და კიდევ ეშმაკს აცვია პრადა რომ ბრუნდება

ვერა, ვერ ეღირსებით პრადაში გამოწყობილი ეშმაკების დაბრუნებას!

8. საუკუნის საუკეთესო წიგნების ასეულში რომ არცერთი ქართველი მწერლის წიგნი არ მოხვდა

თუ იმას გავითვალისწინებთ, რომ ამ სიის შემდგენელმა The New York Times-მა ცოტა ხნის წინ საქართველოს მთავრობის "რეპრესიულ პოლიტიკასა და პრორუსულ კურსზეც" დაწერა, ყველაფერი ცხადია...

9. ოლიმპიადაზე ბერძნულ-რომაულ ჭიდაობაში რომ უმედლოდ დავრჩით

ბოლო 28 წელი თუ ყოველთვის ვიღებდით მედლებს ჭიდაობის ამ სახეობაში, რაღა ამჯერად, არჩევნების წელს დავრჩით უმედლოდ? ისევ გლობალური ომის პარტიის ხელი ხომ არ ურევია ამ ყველაფერში? უნდათ, რომ ბერძნებს და რომაელებს გადაგვამტერონ!

10. დაბოლოს, საერთოდაც, პარიზის ოლიმპიადა რომ ისე ტარდება, როგორც ტარდება!

ვის უკვირს ოლიმპიადის დრამები მას შემდეგ, რაც ვნახეთ, როგორ "სატანის მეჯლისით" გაიხსნა ღონისძიება?!

(ხუმრობა იქით იყოს და ხელისუფლების პროპაგანდისტმა ოლიმპიადის გახსნა, რუსული ნარატივის კვალდაკვალ, სწორედ ასე შეაფასა).

ბოლო ამბები:

გირჩევთ