ევოლუშენ ჯორჯიამ განცხადება გაავრცელა, სადაც იუწყება, რომ ბოლოდროინდელი მოვლენების ფონზე გადახედა საქართველოში საკუთარი წარმომადგენლობას და თანამშრომლების შემცირების პროცესს იწყებს.

"სამწუხაროდ, ერთ-ერთი ადგილობრივი პროფკავშირის წამოწყებული ბოლოდროინდელი არამართლზომიერი აქტივობების გამო, საქართველოში ევოლუშენის ოპერირება შეფერხდა და დაზარალდნენ ევოლუშენის ბიზნეს პარტნიორები, რომელთა დიდ ნაწილს აღარ სურს საქართველოს სტუდიიდან სერვისის მიღება."

ევოლუშენის თქმით, სპეციფიკური მაგიდების უმეტესობას შექმნილი ვითარების გამო სხვა ქვეყნებში გადაიტანს. მაგიდების შემცირება უკვე დაწყებულია.

ევოლუშენი აფრთხილებს აქციის მონაწილეებს, რომ თუ სიტუაცია არ გაუმჯობესდება, შემცირება გაგრძელდება იქამდე, "სანამ პროფკავშირის მიერ ინიცირებული კანონსაწინააღმდეგო ქმედებით გამოწვეული ზიანის შეფასება არ დასრულდება."

"ეს სამწუხარო გადაწყვეტილება ადვილი მისაღები არ იყო. აღნიშნული პროფკავშირის არამართლზომიერი ქმედებების პირდაპირი შედეგია და საქართველოს სტუდიაზე ამ ქმედებების ნეგატიური გავლენებითაა გამოწვეული", აცხადებს კომპანია.

შეგახსენებთ, რომ კომპანიის თანამშრომლები 12 ივლისიდან გაიფიცნენ, გაფიცვა ამ დრომდე მიმდინარეობს.

თანამშრომლები ითხოვენ, მათი შრომის შესაბამის ანაზღაურებას და ღირსეულ სამუშაო პირობებს; გაფიცულმა თანამშრომლებმა, 8 აგვისტოს, შიმშილობის დაწყების შესახებ განაცხადეს.

გაფიცვას 4000-ზე მეტი თანამშრომელი შეუერთდა.