საქართველოს პრეზიდენტის მრჩეველი საგარეო ურთიერთობათა საკითხებში, თენგიზ ფხალაძე ამბობს, რომ საქართველოს ოკუპირებული ტერიტორიების არაღიარების პოლიტიკა მოგებული აქვს. ასე გამოეხმაურა ფხალაძე რუსეთის პრეზიდენტის, ვლადიმერ პუტინის აფხაზეთში ვიზიტის შესახებ გავრცელებულ ინფორმაციას.

მისი თქმით, ვიზიტი რუსეთის მხრიდან ისტორიული უსამართლობის ლეგიტიმაციის მცდელობაა. ფხალაძის შეფასებით, ეს წაგებული ომია.

"როდესაც საუბარია მსგავსი ტიპის ქმედებებზე, ეს მხოლოდ და მხოლოდ ზიანს აყენებს რუსეთის ფედერაციის იმიჯს. რაც შეეხება ოკუპაციის თემატიკას და ფარული ანექსიის მცდელობებს, დარწმუნებული ვარ, რომ ამ ბრძოლასაც საქართველო მოიგებს და ისტორიული სამართლიანობა აუცილებლად აღდგება", - განაცხადა თენგიზ ფხალაძემ.

აგვისტო ომის მეცხრე წლისთავზე რუსეთის პრეზიდენტი, ვლადიმერ პუტინის ვიზიტია დაგეგმილი. ამის შესახებ პრეზიდენტის პრესმდივანმა, დიმიტრი პესკოვმა РБК-სთან საუბარში განაცხადა.