ტვინში არსებული ღეროვანი უჯრედები შესაძლოა სიცოცხლის გასახანგრძლივებლად და დაბერების შესაჩერებლად უმთავრესი იარაღი იყოს. ამ უჯრედებს, რომლებიც ჰიპოთალამუსშია (რედიონი, რომელიც წარმოქმნის ჰორმონებსა და სხვა სასიგნალო მოლეკულებს) მოთავსებული, შეუძლიათ შუა ხნის ასაკის თაგვების ტვინის შესუსტებული ფუნქციები და კუნთები კვლავ გააძლიერონ. ამის შესახებ ჟურნალ Nature-ში 26 ივლისს გამოქვეყნებული კვლევაში ვკითხულობთ.

წინა კვლევები აჩვენებდა, რომ ჰიპოთალამუსი დაბერების პროცესში მონაწილეობდა, მაგრამ ეს უკანასკნელი კვლევა აჩვენებს, რომ ამ რეგიონში არსებულმა ღეროვანმა უჯრედებმა შესაძლოა პროცესი შეანელოს. ალბერტ აინშტაინის მედიცინის კოლეჯის ნეიროენდოკრინოლოგის, დონგშენგ ქაის თქმით, ეს საკმაოდ რეალურია, რადგან ჰიპოთალამუსს სხეულის ფუნქციების შესრულებაში უამრავი როლი აკისრია, მათ შორის ანთებითი პროცესების და მადის.

ქაიმ და მისმა კოლეგებმა კვლევაში აღმოაჩინეს, რომ ჰიპოთალამუსში არსებული ღეროვანი უჯრედები თაგვების ასაკის მატებასთან ერთად ქრებიან. როდესაც მკვლევრებმა თაგვებში ის ვირუსები შეიყვანეს, რომლებიც ამ უჯრედებს ხოცავდა, ცხოველები უფრო სწრაფად დაბერდნენ. შედეგად კი მათი მეხსიერება, კუნთების სიძლიერე, კოორდინაცია და გამძლეობა საგრძნობლად შესუსტდა. ისინი ასევე ჩვეულებრივ თაგვებზე ბევრად ადრე დაიხოცნენ.

შემდეგ კი, მეცნიერებმა ახალშობილი თაგვების ჰიპოთალამუსებიდან აღებული ღეროვანი უჯრედები შუა ხნის თაგვებში შეიყვანეს. ოთხი თვის შემდეგ, ამ ცხოველებს უკეთესი კოგნიტური და კუნთოვანი ფუნქციები ჰქონდათ, ვიდრე ჩვეულებრივ, ამავე ასაკის თაგვებს. მათი სიცოცხლე, საშუალოდ, 10%-ით გახანგრძლივდა.

მკვლევრებმა აღმოაჩინეს, რომ ეს ღეროვანი უჯრედები თავზურგტვინის სითხეში გამოყოფენ მოლეკულებს, სახელად microRNA, რომლებიც გენის ექსპრესიას არეგულირებს. როდესაც მკვლევრებმა შუა ხნის თაგვების ტვინში ეს microRNA-ები შეიყვანეს, მათ დაინახეს, თუ როგორ შეანელა ამ მოლეკულებმა კოგნიტური შესუსტება და კუნთების დეგენერაცია.

FOREVER YOUNG

საკმაოდ საინტერესო ნაშრომია, ამბობს ლეონარდ გარენტი, MIT-ს მოლეკულური ბიოლოგი, რომელიც დაბერებას სწავლობს. მისი თქმით, ამან შესაძლოა ანტი-დაბერების თერაპიების განვითარების მრავალი გზა წარმოქმნას.

ღეროვანი უჯრედების თერაპიამ, შესაძლოა, ჰიპოთალამუსს უკეთესი შესაძლებლობა მისცეს, რომ მთავარი რეგულატორის როლი შეასრულოს. უკანასკნელი შედეგები იმაზე მეტყველებს, რომ ის დაბერების პროცესს სიგნალის პეპტიდებით აკონტროლებს, როგორებიცაა ჰორმონები და microRNA-ები, აცხადებს ქაი. ის ამბობს, რომ მისი გუნდი ცდილობს, დაადგინოს, რომელი microRNA-ები წარმოიქმნება დაბერებისას და იმედოვნებს, რომ გამოიკვლევს, არსებობს თუ არა მსგავსი მექანიზმები სხვა პრიმატებშიც.

ვაშინგტონის უნივერსიტეტში მოღვაწე შინ იჩირო იმაის თქმით, რომელიც დაბერებას სწავლობს, ეს აღმოჩენები გარღვევაა დაბერების პროცესის კვლევაში. მისი თქმით, შემდეგი ნაბიჯი იქნება ის, რომ ეს ღეროვანი უჯრედები დავაკავშიროთ დაბერების პროცესის სხვა ფიზიოლოგიურ მექანიზმებს. მაგალითად, ეს უჯრედები შესაძლოა არეგულირებენ ნეირონებს, რომლებიც ე.წ. GnRH ჰორმონებს გამოყოფენ და ასოცირებულები არიან დაბერებასთან. იმაის ასევე სურს, გაიგოს, microRNA-ებს შეუძლიათ თუ არა უჯრედებიდან სისხლში გადასვლა, საიდანაც ისინი მთელ სხეულში იმოძრავებენ.

ქაის აზრით, დაბერების საწინააღმდეგო თერაპიები, უნდა ჩატარდეს ადამიანის შუა ასაკში, სანამ მისი კუნთები და მეტაბოლიზმი შეუქცევადად არ გადაგვარდება.

უცნობია, ასეთი თერაპია რამდენი ხნით გაახანგრძლივებს ადამიანის სიცოცხლეს, მაგრამ გარენტი ამბობს, რომ დაბერების ეფექტების შენელება უფრო მნიშვნელოვანი მიზანია. „ხანგრძლივი სიცოცხლე არ არის მნიშვნელოვანი, თუ არ ხარ ჯანმრთელი“, ამბობს ის.