23-27 აპრილს მონტენეგროს დედაქალაქ, პოდგორიცაში, გამართული 2025 წლის ევროპის ძიუდოს ჩემპიონატი საქართველოსთვის ისტორიული აღმოჩნდა. ქართველმა ძიუდოისტებმა გუნდურ შეჯიბრებაში ოქროს მედალი მოიპოვეს. განსაკუთრებით აღსანიშნავია, ქალ ძიუდოისტთა წვლილი გუნდის გამარჯვებაში: ოთხიდან სამი გამარჯვება სწორედ მათ ანგარიშზეა. მარიამ ჭანტურიამ, გურამ თუშიშვილმა, ეთერ ლიპარტელიანმა და სოფიო სომხიშვილმა მოწინააღმდეგე გუნდის მებრძოლები დაამარცხეს.

წილისყრამ გადამწყვეტ შეხვედრად ქალთა +70 კგ წონითი კატეგორია დაასახელა, სადაც სოფიო სომხიშვილმა იპონით დაამარცხა მოწინააღმდეგე და საქართველოს ევროპის ჩემპიონობა მოუტანა.

ქართველმა ძიუდოისტმა ქალებმა კლასისა და ბრძოლისუნარიანობის დემონსტრირება კიდევ ერთხელ მოახდინეს. მათ მიერ მოპოვებული სამი გამარჯვება გადამწყვეტი აღმოჩნდა გუნდის საერთო წარმატებისთვის.

"ჩვენთვის შერეულ გუნდურ ჩემპიონატში ოქროს მოპოვება დიდი მოტივაცია იყო. ჩემთვის განსაკუთრებით — ინდივიდუალურ შეჯიბრებაში ფინალი წავაგე, ამიტომ ეს ოქრო ორჯერ ძვირფასია ჩემთვის. ეს ჩვენი ქვეყნისთვის გავაკეთეთ. ბიჭებს ზურგს ვუმაგრებდით და ეს ახალგაზრდა თაობისთვის მოტივაციაა, რომ ქალები ძიუდოს მიჰყვნენ. გვიხარია, რომ ოქრო მოვიპოვეთ და ყველაფერს გავაკეთებთ ქალთა ძიუდოს განვითარებისთვის" — განაცხადა ეთერ ლიპარტელიანმა.

საქართველოს გუნდური ოქრო ევროპის ჩემპიონატზე კიდევ ერთხელ ადასტურებს ქვეყნის ძლიერ პოზიციებს ძიუდოს სამყაროში. ქალთა გუნდის წარმატება კი განსაკუთრებულად მნიშვნელოვანია, რადგან ხაზს უსვამს, ქალთა სპორტის განვითარებისა და მხარდაჭერის აუცილებლობას საქართველოში.