რუსეთის შინაგან საქმეთა სამინისტრომ ვლადიმერ პუტინს შესთავაზა, შეიქმნას იმ ადამიანების მონაცემთა ბაზა, რომლებმაც დატოვეს რუსეთი "ექსტრემისტული ორგანიზაციების საქმიანობაში მონაწილეობის მისაღებად, ასევე არამეგობრული სახელმწიფოების უცხოურ ცენტრებში სწავლებისთვის".

ეს არის ექსტრემიზმის წინააღმდეგ ბრძოლის ახალი სტრატეგიის ნაწილი.

დოკუმენტი განხილვის ეტაპზეა. ოფიციალურ იურიდიულ საინფორმაციო პორტალზე, ავტორიზებულ მომხმარებლებს შეუძლიათ დატოვონ საკუთარი წინადადებები და შეფასება პროექტის შესახებ.

კონკრეტულად, ვინ შევა ახალ მონაცემთა ბაზაში, უცნობია.

დოკუმენტის სხვა ნაწილებში, "ექსტრემისტულ საფრთხედ" მოხსენიებული არიან: ადამიანები, რომლებიც წავიდნენ განათლების მისაღებად უცხოურ რელიგიურ საგანმანათლებლო დაწესებულებებში; ასევე — "არამეგობრული სახელმწიფოების" და საზოგადოებრივი ჯგუფების ჰიბრიდული ქმედებები; უკრაინული სტრუქტურები.

The Bell-ის ანალიზის თანახმად, უკრაინაში სრულმასშტაბიანი შეჭრის დაწყებიდან, დაახლოებით 650 ათასმა მოქალაქემ დატოვა რუსეთი და სამშობლოში ჯერ არ დაბრუნებულა.

ამ კვლევის მიხედვით, რუსების ყველაზე დიდი ნაწილი წავიდა ქვეყნებში, სადაც მათ ვიზა არ სჭირდებოდათ — სომხეთში 110 ათასი, ყაზახეთში 80 ათასი, საქართველოში კი — 84 ათასი ადამიანია.

შსს-ს პროექტის წარდგენამდე, გამოცემა აგენტსტვო წერდა, რომ გაჟონილი მონაცემების ბაზების ერთ-ერთმა ყველაზე პოპულარულმა აგრეგატორმა შეადგინა იმ ადამიანების სიები, ვინც დატოვა რუსეთის ფედერაცია. ამ ბაზაში ადამიანები დაყოფილები არიან ქვეყნიდან წასვლის მიზეზების მიხედვით — ომის დაწყება უკრაინაში, ევგენი პრიგოჟინის ამბოხი და მობილიზაციის გამოცხადება.

სტრატეგიის მიხედვით, რუსეთისთვის მთავარი საფრთხე არის ისლამიზმი (კონკრეტულად, ისლამიზმის გავრცელება სპორტულ ორგანიზაციებში) და რუსეთის მოქალაქეების ჩართვას "რადიკალური ნაციონალისტური შეიარაღებული ჯგუფების საქმიანობაში, მათ შორის უკრაინაში". სტრატეგიის ავტორებმა ცალკე გამოჰყვეს "უკრაინული ნაციონალიზმი", ნახსენებია "ნეონაციზმი" და ქსენოფობიის სხვა ფორმები.

ექსტრემიზმის წინააღმდეგ ბრძოლის მოქმედი სტრატეგია 2025 წლამდე იქნება ძალაში. ახლით ის მას შემდეგ ჩანაცვლდება, რაც შსს-ს მიერ შეთავაზებულ ვერსიას რუსეთის პრეზიდენტი მოაწერს ხელს.