ტერორისტული თავდასხმების დაგეგმვაში ბრალდებულმა დაღესტნელმა, ავსტრიის დეპორტაციის ცენტრში, რუსეთში დეპორტაციამდე რამდენიმე საათით ადრე, თავი მოიკლა.

ხუთშაბათს, ავსტრიულმა ტაბლოიდურმა გაზეთმა Kronen Zeitung-მა გაავრცელა ინფორმაცია მამაკაცის თვითმკვლელობის შესახებ. მათი ინფორმაციით, კაცი ტერორისტული ორგანიზაცია ისლამური სახელმწიფოს რეგიონული ფილიალის, ვილაიათ ხორასანის წევრი იყო. მოგვიანებით, გარდაცვალებასთან დაკავშირებით ინფორმაცია გაავრცელეს სხვა საშუალებებმაც, სამართალდამცველებზე დაყრდნობით.

ჯგუფმა ვილაიათ ხორასანმა აიღო პასუხისმგებლობა მიმდინარე წლის აპრილში მოსკოვის მახლობლად, Crocus City Hall-ის საკონცერტო დარბაზში მომხდარ თავდასხმაზე, რომლის შედეგადაც 140-ზე მეტი ადამიანი დაიღუპა.

გავრცელებული ინფორმაციით, 40 წლის მამაკაცი, შობის ღამეს გეგმავდა თავდასხმებს კიოლნის საკათედრო ტაძარზე და წმინდა სტეფანეს ტაძარზე, მისი თანამზრახველები იყვნენ ორი ტაჯიკი კაცი და თურქი ქალი, რომელიც ერთ-ერთ მათგანზეა დაქორწინებული. Kronen Zeitung აღნიშნავს, რომ ისინი შობამდე ცოტა ხნით ადრე დააკავეს.

გავრცელებული ინფორმაციით, ოთხი დაკავებული მაისის ბოლოს გაათავისუფლეს იოზეფშტადტის ციხიდან, რადგან მათ წინააღმდეგ საკმარისი მტკიცებულებების ვერ მოიპოვეს.

ჯგუფი პირდაპირ პოლიციის დაკავების ცენტრში გადაიყვანეს, დეპორტაციის მოლოდინში. ერთი ტაჯიკი მამაკაცი უკვე დეპორტირებულია, ქალის დეპორტაცია კი თურქეთში ამ კვირაში იგეგმება.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.