დღეს, 12 ივლისს, 12:00 საათზე, ევოლუშენ ჯორჯიას თანამშრომლების ნაწილი, ხელფასების ზრდის და სამუშაო პირობების გაუმჯობესების მოთხოვნით გაიფიცნენ.

პროფკავშირი ლაბორის ცნობით, გაფიცვას, ამ დროისთვის, 4621 ადამიანი უერთდება.

გაფიცვამდე, 2024 წლის 4 ივნისიდან მიმდინარეობდა მედიაციის პროცესიც, რომელიც 24 ივნისს შეთანხმების გარეშე დასრულდა.

გაფიცვა თანამშრომლებმა 5 ივლისს დააანონსეს, რასაც გამოეხმაურა საქართველოს სახალხო დამცველი, ლევან იოსელიანიც.

მან კომპანიას მოუწოდა აქტიური კომუნიკაცია დაამყაროს დასაქმებულებთან, მათ მიერ დაყენებულ პრობლემურ საკითხებთან დაკავშირებით, გამოიყენოს ყველა შესაძლებლობა კონსენსუსის მისაღწევად და თავი შეიკავოს დასაქმებულთა ღირსების შემლახავი ქმედებებისგან.

იოსელიანის თქმით, ევროპის სოციალური ქარტია, რომლის ხელშემკვრელ მხარეს საქართველოც წარმოადგენს, აღიარებს ყველა მუშაკის უფლებას, ჰქონდეს უსაფრთხო, სამართლიანი შრომის პირობები და შრომის სათანადო სამართლიანი ანაზღაურება, რაც უზრუნველყოფს მათი და მათი ოჯახების ცხოვრების ღირსეულ დონეს.

გაიგე მეტი: SJC: მოვუწოდებთ შრომის ინსპექციას, უზრუნველყოს "ევოლუშენ ჯორჯიაში" ღირსეული სამუშაო გარემო