2024 წლის ევროპის საფეხბურთო ჩემპიონატი საქართველოსთვის განსაკუთრებულად წარმატებული გამოდგა. ჩვენი ეროვნული ნაკრები წელს პირველად გავიდა საკვალიფიკაციო ეტაპიდან და პრესტიჟული შეჯიბრის ერთადერთი დებიუტანტი გახდა, რაც უკვე ისტორიული მიღწევა იყო. თუმცა, 26 ივნისს გუნდმა ჩემპიონატის ერთ-ერთი ფავორიტი, პორტუგალია, სუფთა ანგარიშით, 2:0 დაამარცხა და მერვედფინალში ადგილი გაინაღდა.

ჯგუფური ეტაპიდან საქართველოს გასვლას კი, როგორც ჩანს, სიხარული მხოლოდ ჩვენს ქვეყანაში არ მოჰყოლია. ისლანდიის საზოგადოებრივმა მაუწყებელმა, RÚV, ევრო 2024-ზე საქართველოს მიღწეული წარმატების აღსანიშნად, სპორტული გადაცემა ჩვენთვის ნაცნობი სიმღერით დაასრულა. შეჯიბრის გამორჩეული მომენტების ვიდეოკოლაჟს, რომელშიც ქართველი ფეხბურთელები და ქომაგებიც მოხვდნენ, ფონად ჯგუფ ცირკუს მირკუსის Lock Me In ედო. ბენდმა ამ სიმღერით საქართველო 2022 წლის ევროვიზიაზე წარადგინა.

In celebration of Georgia’s historic win, RÚV decided to close off their euro group stage roundup with a familiar song
byu/HallsiKallsi ineurovision

"მგონი, პირველი შემთხვევაა, როცა ჩემი ქვეყნის ნაკრების დამარცხება გამიხარდა", — წერს ვიდეოს კომენტარებში პორტუგალიელი ფანი, — "საქართველო და ქართველი ხალხი მიყვარს. ისიც ვიცი, რამხელა სიხარულია მათთვის ეს. თანაც, ჩვენ უკვე გასულები ვიყავით ჯგუფიდან, ასე რომ, თამაშის შემდეგ ქართველებთან ერთად მეც ვზეიმობდი. აი, ამის გამოც მიყვარს ევროვიზია და ფეხბურთი".

იმის მიუხედავად, რომ საქართველოს ნაკრები ევრო 2024-ის მოგებისთვის ბრძოლას გამოეთიშა, ქართველმა ფეხბურთელებმა შთამბეჭდავი შედეგებით მსოფლიოს ყურადღება მიიქციეს. ნაკრების მეკარემ, გიორგი მამარდაშვილმა, ჩემპიონატის ისტორიაში ერთ-ერთი საუკეთესო შედეგი აჩვენა — 4 მატჩში 30 დარტყმა მოიგერია. წლევანდელი ტურნირის ოთხ საუკეთესო ბომბარდირს შორისაა გიორგი მიქაუტაძეც, რომელმაც სამი გოლი გაიტანა.

2 ივლისს სამშობლოში დაბრუნებულ ეროვნულ ნაკრებს გულშემატკივრებმა საზეიმო დახვედრაც მოუწყვეს.