მოკლედ: თბილისის მერის, კახა კალაძის თქმით, 97 ერთეული თანამედროვე, საერთაშორისო სტანდარტების ვაგონის შესყიდვის მომზადების მიზნით, 27 ივნისს ბაზრის კვლევა გამოცხადდა.

  • ამის შესახებ კალაძემ დღეს, 28 ივნისს, მუნიციპალიტეტის მთავრობის სხდომაზე განაცხადა.

დეტალები: კალაძის თქმით, დაინტერესებული კომპანიებისთვის, ინფორმაცია ხელმისაწვდომია სახელმწიფო შესყიდვების სააგენტოს ვებგვერდზე, როგორც ქართულ, ისე ინგლისურ ენაზე.

ასევე, შესაძლებელია ინფორმაციის გამოთხოვა შპს თბილისის სატრანსპორტო კომპანიიდან.

  • "მეტროს ვაგონების განახლების ყველანაირი რესურსი ამოწურულია. მომდევნო წლებიდან გარკვეული ვაგონების ექსპლუატაციის ვადაც გადის. შესაბამისად, გვინდა, რომ მთლიანად განვაახლოთ ვაგონები მეტროში", — განაცხადა მერმა.
  • მისივე თქმით, შემადგენლობების ჩანაცვლების პროექტის ხანგრძლივობა შეადგენს შვიდ წელს, რომლის ფარგლებშიც, 2030 წლის ჩათვლით, უახლესი, თანამედროვე სტანდარტებით დამზადებული 22 მატარებელი (13 ერთეული 4-ვაგონიანი და 9 ერთეული 5- ვაგონიანი) ეტაპობრივად მიეწოდებათ.

კალაძემ აღნიშნა, რომ ვაგონების შესყიდვის ბიუჯეტი დაზუსტდება ბაზრის კვლევის დასრულების შემდეგ, ხოლო დაინტერესებული კომპანიების წინადადებების მიღების ბოლო ვადა განსაზღვრულია 29 ივლისის ჩათვლით.

  • "პირველადი შეფასებით, საორიენტაციო ბიუჯეტი, დაახლოებით, 200 მლნ ევროა. მატარებლები იქნება "გამჭოლი" ვაგონებით. ახმეტელი-ვარკეთილის ხაზზე იმოძრავებს 5-ვაგონიანი მატარებლები, გაზრდილი მგზავრთნაკადის გათვალისწინებით.
  • ეს მეტროს ვაგონების განახლების პირველი ეტაპია. პროექტი გაგრძელდება ძველი ვაგონების სრულ განახლებამდე. ამჟამად, გვყავს მეტროს 192 ვაგონი", — თქვა კახა კალაძემ.