ჩეჩნეთის ადამიანის უფლებათა კომისარმა განაცხადა, რომ მისმა ოფისმა 2023 წელს რესპუბლიკაში ადამიანის უფლებათა დარღვევის ვერცერთი ფაქტი ვერ აღმოაჩინა.

ჩეჩნეთში ადამიანის უფლებების შესახებ თავის ყოველწლიურ მოხსენებაში მანსურ სოლტაევმა განაცხადა, რომ ეთნიკური ჩეჩნების წინააღმდეგ დაფიქსირებული ყველა დარღვევა ჩეჩნეთის ფარგლებს გარეთ იყო ჩადენილი.

სოლტაევის თქმით, მისმა ოფისმა 2023 წელს მიიღო 1615 მოთხოვნა — წინა წელთან შედარებით, 396-ით მეტი. მის მოხსენებაში მითითებულია, რომ 30,6% შევიდა რუსეთის სხვა ნაწილებიდან, აქედან 135 უკრაინაში საბრძოლველად გაწვეული ჩეჩნებისა და მათი ოჯახების უფლებების დარღვევას უკავშირდებოდა.

დამატებით 231 მოთხოვნა იყო მსჯავრდადებულებისგან, 40-ზე მეტი ეხებოდა უკანონო სისხლისსამართლებრივ დევნას და 20-ზე მეტი უკავშირდებოდა "არაგონივრულ პრევენციულ ზომებს".

მიუხედავად სოლტაევის მოხსენებისა, რომლის მიხედვით, ჩეჩნეთში ადამიანის უფლებების დარღვევა არ დაფიქსირდებოდა, რუსეთის ფედერაციაში შემავალ რესპუბლიკაში მთელი წლის განმავლობაში ხდებოდა ძალადობა, მკვლელობები და გატაცებები.

2023 წლის ივლისში, ჟურნალისტ ელენა მილაშინასა და ადვოკატ ალექსანდრე ნემოვს თავს დაესხნენ, ისინი გროზნოში ზარემა მუსაევას სასამართლო პროცესის გასაშუქებლად მიდიოდნენ. მუსაევა ძმები იანგულბაევების დედაა, რომლებიც ოპოზიციურ ტელეგრამ არხს 1ADAT-ს მართავენ.

გავრცელებული ინფორმაციით, სოლტაევს ჩეჩნეთის ხელმძღვანელმა რამზან კადიროვმა უბრძანა, ისინი ჩეჩნეთიდან ჩრდილოეთ ოსეთის საავადმყოფოში გადაეყვანა. მან გაავრცელა განცხადება, რომელშიც აღნიშნავდა, რომ ჩეჩნეთში ხელახლა ჩასვლის შემთხვევაში, პირდაპირ მას უნდა დაჰკავშირებოდნენ.

მუსაევა 2022 წელს დააკავეს, გავრცელებული ინფორმაციის ფონზე, რომ მისი ჯანმრთელობის მდგომარეობა სულ უფრო უარესდებოდა.

გავრცელებული ინფორმაციით, სანკტ-პეტერბურგიდან, საკუთარი სახლიდან გაიტაცეს 26 წლის ჩეჩენი სედა სულეიმანოვაც, რომელიც ოჯახური ძალადობის მსხვერპლი იყო. უფლებადამცველები შიშობენ, რომ ის, შესაძლოა, მისმა ოჯახმა მოკლა ჩეჩნეთში, ხოლო ჩეჩნეთისა და რუსეთის ხელისუფლება უარს ამბობს მისი პოტენციური მკვლელობის გამოძიებაზე.

სულეიმანოვა ბოლოს 2023 წლის სექტემბერში ნახეს — ვიდეოში, რომელიც სოლტაევმა გამოაქვეყნა, ჩეჩნეთში მისი სავარაუდო გატაცების შემდეგ. სოლტაევი ირწმუნებოდა, რომ ქალი უსაფრთხოდ იყო.

2023 წლის სექტემბერში ყურადღების ეპიცენტრში მოხვდა კადიროვის ვაჟი, ადამ კადიროვი, მას შემდეგ, რაც ჩეჩნეთის ლიდერმა გამოაქვეყნა ვიდეო, სადაც ადამი კაცს ყურანის დაწვის გამო სცემს. ნიკიტა ჟურაველს, თავდაპირველად, ბრალი წაუყენეს ვოლგოგრადში "მორწმუნეთა რელიგიური გრძნობების შეურაცხყოფისთვის", ვიდრე ჩეჩნეთში გადაიყვანდნენ.

რესპუბლიკაში მასობრივი გატაცებებისა და მკვლელობების შესახებ ოპოზიციური ბლოგერები და ტელეგრამ არხებიც იტყობინებიან. 2023 წლიდან ჩეჩნეთში 351 გატაცება და სამი მკვლელობა მოხდა.

მანსურ სოლტევი დასანქცირებულია შეერთებული შტატების, ევროკავშირისა და უკრაინის მიერ, ვაშინგტონმა კი ის ადამიანის უფლებათა დარღვევებთან დააკავშირა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.