მოკლედ: საქართველოს პრემიერ-მინისტრი ირაკლი კობახიძე, მონაწილეობას მიიღებს უკრაინის აღდგენის კონფერენციაში (URC2024), რომელიც 11-12 ივნისს ბერლინში გაიმართება.

  • ინფორმაციას მთავრობის პრესსამსახური ავრცელებს.

დეტალები: პრესსამსახურის ცნობით, ღონისძიების მთავარი მიზანია, უკრაინის აღდგენის, რეკონსტრუქციის, რეფორმებისა და მოდერნიზაციისთვის საერთაშორისო მხარდაჭერის მობილიზება.

URC2024 ფოკუსირებული იქნება ოთხ თემატურ მიმართულებაზე:

  • კერძო სექტორის მობილიზება აღდგენისა და ეკონომიკური ზრდისთვის;
  • სოციალური აღდგენა და ადამიანური კაპიტალი უკრაინის მომავლისთვის;
  • მუნიციპალიტეტებისა და რეგიონების აღდგენა;
  • ევროკავშირში გაწევრიანება და მასთან დაკავშირებული რეფორმები.

კონფერენციის ფარგლებში, ასევე, განხილული იქნება მაკროეკონომიკური სტაბილურობა, მდგრადობა და უსაფრთხოება, ინფრასტრუქტურა, საცხოვრებელი, ენერგეტიკა, გარემოს დაცვა, ჯანდაცვა და განათლება.

  • "პოლიტიკურ ღონისძიებაში, რომელსაც პირველად მასპინძლობს ევროკავშირის წევრი სახელმწიფო, მონაწილეობას მიიღებენ სახელმწიფოებისა და მთავრობის მეთაურები, მინისტრები, საერთაშორისო ორგანიზაციებისა და ფინანსური ინსტიტუტების, ბიზნესისა და სამოქალაქო საზოგადოების ორგანიზაციების წარმომადგენლები".

ბოლო ხაზი: პრემიერ-მინისტრი ბერლინში დელეგაციასთან ერთად გაემგზავრა, რომლის შემადგენლობაში საგარეო საქმეთა მინისტრი ილია დარჩიაშვილი და მთავრობის ადმინისტრაციის უფროსი ლევან ჟორჟოლიანი არიან.