აზერბაიჯანელი ეკონომისტი ფარიდ მეჰრალიზადე მთავრობის მიერ AbzasMedia-ზე განხორციელებული რეპრესიის ფარგლებში დააკავეს, მიუხედავად იმისა, რომ დამოუკიდებელ მედიასაშუალებასთან კავშირი არ ჰქონია.

მეჰრალიზადეს AbzasMedia-ს საქმეზე 1 ივნისს ჩვენება უნდა მიეცა, მაგრამ გავრცელებული ინფორმაციით, იგი გაიტაცეს და დააკავეს ორი დღით ადრე, 30 მაისს.

მისმა ცოლმა, ნარგიზ მუხთაროვამ თქვა, რომ მისი ქმარი 30 მაისს გამთენიისას გაუჩინარდა და შუადღისას სახლში პოლიციის თანხლებით მიიყვანეს.

"პოლიციამ ის სახლში შუადღისას მიიყვანა. გაჩხრიკეს ჩვენი სახლი და წაიღეს მხოლოდ ჩვენი მობილური ტელეფონები, ძველიც კი, რომელიც გამოუსადეგარი იყო. როდესაც პოლიციამ ის დააკავა, თავზე ჩანთა ჩამოაცვეს”, — განუცხადა მან OC Media-ს.

ჩხრეკისას მეჰრალიზადემ მეუღლეს უთხრა, რომ იგი გაიტაცეს ბაქოს მეტროსადგურიდან 28 მაისი.

მეჰრალიზადე არის ეკონომიკური ანალიტიკოსი, რომელსაც ხშირად უკავშირდებიან პრო-სამთავრობო მედია საშუალებები კომენტარებისთვის. ის, ასევე, მართავს ტელეგრამ არხს Çəpəki, რომელიც აშუქებს აზერბაიჯანის ეკონომიკურ პოლიტიკას და სტატისტიკას.

მოულოდნელი დაპატიმრება

მუხთაროვამ განუცხადა OC Media-ს, რომ ისინი არ მოელოდნენ მეჰრალიზადეს დაკავებას, რადგან პოლიციას მისთვის არასოდეს მოუთხოვია ჩვენების მიცემა AbzasMedia-ს წინააღმდეგ.

"ვცდილობდი მეპოვა ლოგიკა ამ ყველაფერში, მაგრამ ვერ ვიპოვე. ყველაფერი ძალიან გაუგებარია ჩემთვის", — თქვა მან.

მისი დაკავების შემდეგ, AbzasMedia-მ, რომელიც ახლა ემიგრაციის პირობებში მუშაობს, გაავრცელა განცხადება, სადაც ხაზგასმით აღნიშნა, რომ მეჰრალიზადესთან არასდროს უმუშავიათ. მათ თქვეს, რომ მან კომენტარი დამოუკიდებელ მედიასაშუალებას მისცა ისევე, როგორც ასობით სხვა ექსპერტმა.

მათ განაცხადეს, რომ "ამ საქმეზე მოწმის სახით დაკითხვაზე მიიყვანეს ათობით ადამიანი, რომლებსაც არანაირი თანამშრომლობა, ან კავშირი არ აქვთ აბზასმედიასთან“.

აზერბაიჯანმა მედიაზე რეპრესიები ნოემბერში დაიწყო, სამიზნე იყო დამოუკიდებელი ჟურნალისტები და პოლიტიკური აქტივისტები.

ამის შემდეგ, ჟურნალისტებმა და აქტივისტებმა აზერბაიჯანში იატაკქვეშა მუშაობა გადაწყვიტეს, დევნის შიშით.

ბაქოს საზოგადოებრივი სივრცე, ახალგაზრდული აქტივიზმის პლატფორმა იყო ერთ-ერთი ბოლო ორგანიზაცია, რომელიც დაიხურა მიმდინარე რეპრესიის ფონზე.

"ჩვენ ვერ ვიმუშავებდით ასეთ მძიმე ვითარებაში და ჩვენი წევრების გადასარჩენად გადავწყვიტეთ პლატფორმის დახურვა”, — განუცხადა OC Media-ს ორგანიზაციის წევრმა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.