HBO-ს პროგრამების დირექტორმა, დეივ ბლოისმა განაცხადა, რომ სამეფო კარის თამაშების მერვე სეზონი უკვე თავიდან ბოლომდე დაწერილია და ამჟამად, პროდიუსერები ხარჯებს ითვლიან და გადაღებებს გეგმავენ. მისივე თქმით, სერიალის ბოლო სეზონი უდიდესი მასშტაბის იქნება და ამიტომ, ჯერ-ჯერობით, უცნობია მოესწრება თუ არა მისი გამოსვლა 2018-ში თუ მაყურებელს 2019-მდე მოცდა მოუწევს.

სამეფო კარის თამაშების ბოლო სეზონი 6-ეპიზოდიანი იქნება და გავრცელებული ინფორმაციით, თითო ეპიზოდი 90 წუთამდე გაგრძელდება. ამ ინფორმაციას ვერ ადასტურებს ბლოისი, მისი თქმით, პროდიუსერები 80-წუთიან ეპიზოდებზე საუბრობენ, მაგრამ ზუსტად არაფრის თქმა შეუძლია.

დევიდ ბლოისი ჟურნალისტებს სატელევიზიო კრიტიკოსების ასოციაციის პრეს ტურზე შეხვდა. გარდა GOT-ის ბოლო სეზონისა, მან შოუს სპინ-ოფების შესახებაც ისაუბრა. მისი თქმით, ახალ შოუებზე მუშაობა უკვე მიდის, მაგრამ როდის იქნება არც ესაა ცნობილი.

"სამეფო კარის თამაშების ბოლო სეზონის შემდეგ ერთი წელი შევისვენებთ და ალბათ მერე დავიწყებთ სპინ-ოფებს, რადგან არ მინდა, ყურადღება შოუს ბოლო სეზონიდან ახალ სერიალებზე გადავიდეს", ამბობს ის.

ერთადერთი, რაც ბლოისმა დაადასტურა, არის ის რომ ახალ სერიალში Game of Thrones-ის ვერც ერთ არსებულ პერსონაჟს ვერ ვიხილავთ.