მოკლედ: თბილისის მუნიციპალიტეტის საკრებულოს ფრაქცია ერთიანი ნაციონალური მოძრაობა ბოიკოტს აცხადებს და აღარ დაესწრება თბილისის საკრებულოსა და საკრებულოს კომისიების 2024 წლის სხდომებს.

დეტალები: "ივანიშვილის რეჟიმმა წლების განმავლობაში ნაწარმოები სიძულვილის კამპანია ფიზიკურ ანგარიშსწორებებში გადაზარდა, ამჯერად, არამარტო პოლიტიკური ოპონენტების, არამედ, სამოქალაქო აქტივისტებისა და ნებისმიერი განსხვავებული აზრის მქონე ადამიანის მიმართ, რომელთაც ლაჩრულად, ჯგუფურად უსწორდება", — წერს ფრაქცია ენმ.

  • მათი თქმით, რუსული რეჟიმი შეუძლებელს ხდის ადგილობრივი თვითმმართველობის ორგანოების მუშაობას.

კონტექსტი: დღეს, 24 მაისს, პარტია ლელომ და გირჩი — მეტი თავისუფლებამ, თბილისის საკრებულოს სხდომებს ბოიკოტი გამოუცხადეს.

  • ლელო აცხადებს, რომ ბოიკოტის რეჟიმში დარჩება მანამ, სანამ პოლიტიკური მოცემულობა არ შეიცვლება.
  • გირჩი — მეტი თავისუფლების წევრის, ცოტნე კობერიძის თქმით, თბილისის საკრებულო გაურბის კონსტიტუციური ვალდებულებას, უზრუნველყოს ქვეყნის პროდასავლური კურსი:
  • "მიუხედავად იმისა, რომ აქ ადამიანებს სცემენ, ქუჩაში ხვდებიან ბიტებით. ჩუმად არის აქ [თბილისის საკრებულოში] ყველა დეპუტატი და ხმა არავის ამოუღია. ჩვენთვის ეს სიჩუმე არის ის გედის სიმღერა, რომელიც "ქოცებს" აქვთ.

ასევე, 14 მაისს, პარლამენტში რუსული კანონის მესამე მოსმენით მიღების შემდეგ, პარტია ლელომ, დამოუკიდებელმა დეპუტატმა სალომე სამადაშვილმა და ერთიანი ნაციონალური მოძრაობის დეპუტატებმა განაცხადეს, რომ გადადიან ბოიკოტის რეჟიმში და აღარ მიიღებენ მონაწილეობას საპარლამენტო საქმიანობაში.

  • ოპოზიციური პარტიების ბოიკოტს შეუერთდა პარტია მოქალაქეებიც.
  • 15 მაისს, ბოიკოტს შეუერთდნენ აჭარის უმაღლესი საბჭოს ერთიანი ნაციონალური მოძრაობის დეპუტატები, ხოლო 16 მაისს, აჭარის მუნიციპალიტეტში საკრებულოს წევრები ერთიანი ნაციონალური მოძრაობიდან.