თბილისის ბაგა-ბაღებში აღსაზრდელებისა და აღმზრდელის ინტოქსიკაციის ფაქტზე გამოძიების პროცესში დაავადებათა კონტროლის ეროვნული ცენტრიც ჩაერთო. როგორც "პირველ არხთან" ციციშვილის სახელობის ბავშვთა კლინიკის სამედიცინო დირექტორი მაია ჩხაიძე აცხადებს, მათ კლინიკაში 17 სექტემბრის საღამოს 16 პაციენტი შევიდა. მათ ღებინება საღამოს საათებში დაეწყოთ. მაია ჩხაიძის თქმით, დიაგნოზი დასაზუსტებლად ნიმუშებს დაავადებათა კონტროლის ეროვნული ცენტრი (NCDC) წაიღებს და გამოიკვლევს.

"16 პაციენტია შემოსული გუშინ კლინიკაში. პაციენტები შემოსულები არიან გუშინ. ძირითადად, როგორც გამოვკითხეთ მშობლებს, ანამნეზში ღებინება დაიწყო საღამოს საათებში. ზოგს აქვს დიარეა გამოხატული, ზოგს – არა, ცხელების გარეშე. ყველა არის საჯარო ბაღიდან. რეანიმაცია და ინტენსიური თერაპია არ სჭირდება ჯერჯერობით, მაგრამ დიაგნოზი დასაზუსტებლად – ვთქვათ, კვებითი ინტოქსიკაციაა თუ სხვა რამ იწვევს გასტროენტერიტს – ამისათვის დილიდან ავიღებთ ნიმუშებს. გამოკვლევა კლინიკაში არ ხდება და დაავადებათა კონტროლის ეროვნული ცენტრი წაიღებს ამ ნიმუშებს და გამოიკვლევს. ბავშვებს ჯერჯერობით ვერ გაწერენ, იმიტომ რომ ესენი ზოგი ღამის პირველ საათზე შემოვიდა, ღამის ორ საათზე. ჯერჯერობით უნდა დავაკვირდეთ, იმიტომ რომ სავარაუდოდ შეიძლება დიარეაც წამოვიდეს. გასტროენტერიტის კლინიკა არის ამ წუთში გამოხატული ყველასთან", — აცხადებს ციციშვილის სახელობის ბავშვთა კლინიკის სამედიცინო დირექტორი.

თბილისის 20 ბაგა-ბაღში 55 აღსაზრდელისა და 1 აღმზრდელის ინტოქსიკაციის შესახებ ინფორმაცია ფინანსთა სამინისტროს საგამოძიებო სამსახურმა გაავრცელა. მათი ცნობით, გამოძიება მიმდინარეობს საქართველოს სისხლის სამართლის კოდექსის 198-ე მუხლის მეორე ნაწილით, ადამიანის სიცოცხლისათვის ან ჯანმრთელობისათვის საშიში პროდუქციის დამზადება-რეალიზაციის ფაქტზე, რამაც საფრთხე შეუქმნა ადამიანის სიცოცხლეს ან ჯანმრთელობას.