რუსული კანონის საპროტესტო აქციების მხარდასაჭერი კონცერტების სერიას ქართველი ჰიპ-ჰოპ არტისტებიც უერთდებიან. საქველმოქმედო კონცერტების სერია რამდენიმე დღის წინ დაანონსდა. მისი ორგანიზატორი საქართველოს მუსიკოსთა პროფესიული კავშირია.

სერიის მორიგი ღონისძიება 10 მაისს, საღამოს 9 საათზე, წერეთლის 114-ში (კოკა-კოლის ყოფილ ქარხანაში) გაიმართება. ჰიპ-ჰოპ არტისტების კონცერტზე დასწრების საფასური 20 ლარია, შემოსული თანხა კი, საპროტესტო აქციების მხარდაჭერას, მათ შორის, დაკავებული დემონსტრანტების საჭიროებებს მოხმარდება.

"ჩვენ, რეპერები, ჩვენი კომფორტული ზონიდან, ანუ სცენიდან, დღევანდელ თემებთან დაკავშირებით ჩვენს აზრს დავაფიქსირებთ, ჩვენი ევროპული მომავლისთვის", — აცხადებს Cas.

Cas-ის გარდა, კონცერტში მონაწილეობას მიიღებენ Skyress, Pele, Nick Green, Taha, Dzvali DJ Bone და Dj Gigi Chichua. ბილეთების შეძენა biletebi.ge-ზეა შესაძლებელი.

"არაერთხელ დამიფიქსირებია და კიდევ მრავალჯერ დავაფიქსირებ ჩემს აზრს მიმდინარე მოვლენებთან დაკავშირებით", — ამბობს Taha, — "საქართველოს ადგილი არის ევროპაში, რუსეთი ყოველთვის იყო, არის და იქნება საქართველოს მტერი".

რაც შეეხება კონცერტების სერიას, რომლის ფარგლებშიც აღნიშნული ღონისძიება იმართება: პროექტმა სტარტი 7 მაისს აიღო, როცა დედაენის ბარში სანდრო ნიკოლაძის ჯემ სესია გაიმართა.

"საქართველოს გეზი ევროპისკენ მიდის, ყველა სხვა გზა კურსიდან გადახვევაა, რასაც კატეგორიულად არ ვეთანხმებით", — აცხადებენ კონცერტების სერიის ორგანიზატორები.