დედაქალაქის ბიუჯეტის მოცულობა 4,5 მილიონი ლარით გაიზრდება. დღეს, 25 ივლისს, დეპუტატებმა თბილისის მთავარ ფინანსურ დოკუმენტში შესატან ცვლილებებზე იმსჯელეს და იგი ხმათა უმრავლესობით დაამტკიცეს.

აღნიშნული პროექტი საკრებულოს წევრებს თბილისის მერიის საფინანსო სამსახურის უფროსმა, გაიოზ თალაკვაძემ წარუდგინა. მისი განმარტებით, ბიუჯეტის გაზრდის გარდა 2017 წლის გადასახადებში 15 მილიონი ლარი გადანაწილდა. პროექტის მიხედვით, თანხის ძირითადი ნაწილი ჯანდაცვისა და სოციალური დახმარებების პროგრამებს, საგზაო ინფრასტრუქტურის მშენებლობას, აღდგენასა და მოვლა-შეკეთებას, ასევე სკოლამდელი აღზრდის დაწესებულებების ხელშეწყობას მოხმარდება.

ბიუჯეტის პროექტით, ბაგა-ბაღების ხელშეწყობისთვის შვიდი მილიონი ლარი გამოიყოფა. თალაკვაძემ აღნიშნა ისიც, რომ 2,2 მილიონი ლარით იზრდება ჯანდაცვის პროგრამები, რომელთა ბიუჯეტით აუტიზმის სპექტრის დარღვევის მქონე ბავშვთა რეაბილიტაციის პროგრამა, C ჰეპატიტის დიაგნოსტიკა, ძვლის ტვინის ტრანსპლანტაცია და ძუძუს კიბოს სამკურნალო მედიკამენტების დაფინანსებაა გათვალისწინებული. გარდა ამისა, დამტკიცებული ბიუჯეტის პროექტით 4 მილიონი ლარი დაემატება სხვა სოციალური საჭიროების დახმარებებს.

ხოლო, საგზაო ინფრასტრუქტურის მშენებლობის, აღდგენისა და მოვლა-შეკეთების პროგრამისთვის გათვალისწინებულია ბიუჯეტის 1,7 მილიონი ლარით გაზრდა.

თბილისის მერიის საფინანსო სამსახურის უფროსის განცხადებით, აღნიშნული თანხები სხვადასხვა პროგრამებსა და ქვეპროგრამებში არსებული ტენდერებიდან და ხელშეკრულებებიდან მიღებული ეკონომიებიდან გამოთავისუფლდა.