მოკლედ: საქართველოს სახალხო დამცველი, ლევან იოსელიანი, რუსული კანონის მოწინააღმდეგეების მიმართ, სატელეფონო მუქარის ფაქტებს ეხმაურება და აცხადებს, რომ მსგავსი პრაქტიკის დაშვება დამაზიანებელია ქვეყანაში დემოკრატიული პროცესებისა და ადამიანის უფლებების რეალიზაციისთვის.

დეტალები: სახალხო დამცველის განმარტებით, გამოხატვის თავისუფლებით დაცულია არა მხოლოდ პოზიტიური ზოგადი ინფორმაცია, არამედ ისეთებიც, რომელიც შეურაცხმყოფელი, გამაოგნებელი ან შემაწუხებელია სახელმწიფოს ან საზოგადოების რომელიმე ჯგუფისთვის:

  • "პოლიტიკური შინაარსის გზავნილები განსაკუთრებული დაცულობით სარგებლობს და აღნიშნული დემოკრატიული პროცესების განუყოფელი ნაწილია.
  • დაუშვებელია ნებისმიერი ისეთი ქმედება, რომელიც საზოგადოების ნაწილს გაუჩენს შიშს და გამოიწვევს თვითცენზურას საკუთარი კონსტიტუციური უფლებით სარგებლობასთან დაკავშირებით".

საქართველოს სახალხო დამცველი მოუწოდებს სამართალდამცავ ორგანოებს, დაიწყონ გამოძიება მოქალაქეების მიმართ შესაძლო მუქარის ფაქტზე:

  • "ასევე, მივმართავ მოქალაქეებს, სიცოცხლის მოსპობით, ან სხვა ტიპის მუქარების მიღების შემთხვევაში, მიმართონ საგამოძიებო უწყებებს".

კონტექსტი: ბოლო დღეების განმავლობაში, აქტივისტებისა და კანონის მოწინააღმდეგეების ტელეფონებზე არაერთი ზარი დაფიქსირდა, უმეტესად, უკრაინასა და სხვა ქვეყნებიდან.

  • უცნობი პირები სიტყვიერ შეურაცხყოფას აყენებენ ადრესატებს და ემუქრებიან.
  • გუშინ, 8 მაისს, ჟურნალისტური რესურსცენტრის ხელმძღვანელმა ნათია კუპრაშვილმა დაწერა, რომ სამი უცხო ქვეყნიდან შემომავალი ზარის შემდეგ, მას ქართული ნომრიდანაც დაურეკეს.

მსგავსი: "ამჯერად საქართველოს ნომრით დამიკავშირდნენ, მითხრეს, რომ მელოდებოდნენ ბინასთან" — ნათია კუპრაშვილი

8 მაისს, პერსონალურ მონაცემთა დაცვის სამსახურმა განაცხადა, რომ უცნობი პირების მიერ მოქალაქეთა სატელეფონო ნომრების დამუშავების კანონიერებას შეისწავლის.