რა ხდება: რუსული კანონის მოწინააღმდეგეებს, სხვა ქვეყნების სატელეფონო ნომრების შემდეგ, უკვე საქართველოში რეგისტრირებული ნომრებითაც ურეკავენ და ემუქრებიან.

დეტალები: ჟურნალისტური რესურსცენტრის ხელმძღვანელი, ნათია კუპრაშვილი წერს, რომ სამი უცხო ქვეყნიდან შემომავალი ზარის შემდეგ, მას ქართული ნომრიდანაც დაურეკეს.

• "+995 551 073 366 — ამჯერად საქართველოს ნომრით დამიკავშირდნენ, მას შემდეგ, რაც სამი უცხო ქვეყანა გამოიყენეს და ვერაფერი გააწყვეს.
• ვუპასუხე ამ ზარს. დაასახელეს ჩემი მისამართი და მითხრეს, რომ მელოდებოდნენ ბინასთან.
  ვიკითხე ვინ იყვნენ და რატომ მელოდებოდნენ და შემდეგ მოაყოლეს, რომ უნდა გამისწორდნენ და იმიტომ", — წერს კუპრაშვილი.

ქართული ნომრიდან მსგავსი ზარის შესახებ ფეისბუქზე წერს ახალგაზრდული ორგანიზაცია დაფიონიც.

კონტექსტი: ბოლო დღეების განმავლობაში, აქტივისტებისა და კანონის მოწინააღმდეგეების ტელეფონებზე არაერთი ზარი დაფიქსირდა, უმეტესად, უკრაინასა და სხვა ქვეყნებიდან.

• უცნობი პირები სიტყვიერ შეურაცხყოფას აყენებენ ადრესატებს და ემუქრებიან.
• სამართალდამცავ ორგანოებს ზარების შესახებ განცხადება არ გაუვრცელებიათ.
• NEWS.On.ge-ს შსს-ში უთხრეს, რომ დააზუსტებენ ინფორმაციას, არის თუ არა უწყებაში შესული მიმართვა მუქარებთან დაკავშირებით, ან მიმდინარეობს თუ არა გამოძიება.

დღეს პარლამენტის თავმჯდომარემ, შალვა პაპუაშვილმა განაცხადა, რომ ქართული ოცნება შექმნის მონაცემთა ბაზას, სადაც მათ შესახებაც განათავსებენ ინფორმაციას, ვინც საჯაროდ იწონებს იმას, რასაც ქართული ოცნება "ძალადობას", "მუქარასა" და "შანტაჟს" უწოდებს.

• ასეთ პირთა მიმართ, მისივე თქმით, გამოყენებული იქნება "კონსტიტუციისა და კანონის ფარგლებში მიღებული ზომები."

საღამოს, შსს-ში გამართულ ბრიფინგზე კი კრიმინალური პოლიციის უფროსმა, თეიმურაზ კუპატაძემ მედიასა და საზოგადოებას აჩვენა სხვა ქვეყნებში პოლიციის მიერ აქციების დარღვევის მძიმე კადრები და თქვა, რომ საქართველოს პოლიცია, ბოლო დროს გამართული მშვიდობიანი აქციის მონაწილეების მიმართ ლმობიერად იქცეოდა.

• თუმცა, გააფრთხილა აქციის მონაწილეები და ორგანიზატორები, რომ "როდესაც პოლიცია კანონის შესაბამისად დაიწყებს აქციის მონაწილეთა ძალადობრივი ქმედებების აღკვეთას, გამოყენებული იქნება მკაცრი ზომები, ისევე როგორც ამერიკის და ევროპის წამყვან ქვეყნებშია მიღებული".