მოკლედ: 17:00 საათზე დაიწყეს ქალთა მარშის მონაწილეთა შეკრება პირველი რესპუბლიკის მოედანზე. ეს იქნება ქალთა მარში, სახელწოდებით — ქალები ვირჩევთ ევროპას! აქცია-მსვლელობის ორგანიზატორია ქალთა მოძრაობა.

რა არის გეგმა: რესპუბლიკის მოედნიდან ისინი მსვლელობით გადაინაცვლებენ საქართველოს პარლამენტის შენობასთან.

  • პარლამენტთან შეკრებილებს აქციის ორგანიზატორები სიტყვით მიმართავენ.
  • მოსალოდნელია, მარშის შემადგენლობა დარჩეს პარლამენტთან, სადაც 19:00-ზე ახალგაზრდების მიერ ორგანიზებული პროტესტი გაიმართება რუსული კანონის წინააღმდეგ.
  • როგორც ორგანიზაცია საფარის აღმასრულებელმა დირექტორმა, ბაია პატარაიამ On.ge-სთან თქვა, სლოგანი — ქალები ვირჩევთ ევროპას, მნიშვნელოვანია და მხოლოდ დღევანდელი კი არა, ამ საარჩევნო წლის სლოგანი იქნება.

დეტალები: ქალთა დღევანდელ მარშს აქვს პოლიტიკური გზავნილი, რომელიც აღნიშნავს ქალების, როგორც საქართველოს მოსახლეობის უმრავლესობის ელექტორალურ ძალასა და მათ პროევროპულ მისწრაფებას.

პატარაია ამბობს, რომ მოახლოებული საპარლამენტო არჩევნების კონტექსტში, ქალებისთვის მნიშვნელოვანი იქნება, რომელი პოლიტიკური ძალისთვის იქნება პრიორიტეტული ქალთა უფლებები და ქვეყნის ევროინტეგრაციისკენ სწრაფვა.

ბაია პატარაია: "ქალები ამომრჩევლის უმრავლესობა ვართ და ჩვენ, უკვე დროა, ჩვენი არჩევანი გავაკეთოთ იმის მიხედვით, თუ რომელი პარტიაა პროევროპული, რომელ პარტიას მოაქვს ჩვენთვის ევროკავშირი და ევროპა და რომელი პარტია გვთავაზობს ქალების უფლებების დაცვას.

  • მოგეხსენებათ, რომ ორ დღეში გააუქმა გენდერული კვოტები ქართულმა ოცნებამ და ამით განგვიცხადა, ქალების ადგილი ქართულ პოლიტიკაში არ არისო, რადგან კვოტების გაუქმება უფრო შეამცირებს ქალთა წარმომადგენლობას პარლამენტში და ეს, ქალი ამომრჩევლებისთვის, მიუღებელია.
  • ამიტომ ჩვენ, ქალებსაც და საზოგადოებასაც შევახსენებთ, რომ ქალები, რომლებიც ამ ქვეყნის უმრავლესობა ვართ, პირველ რიგში, ამომრჩევლები ვართ."
ქალთა მარში. 2024 წლის 20 აპრილი. თბილისი

ქალთა მარში. 2024 წლის 20 აპრილი. თბილისი

ფოტო: მარიამ მერლანი / On.ge

რედაქციისგან: რატომ გვჭირდება გენდერული კვოტირების პოლიტიკა — პოზიციები და ანალიზი