გუშინ, ილონ მასკმა, თავის ოფიციალურ ტვიტერზე დაწერა, რომ ჰაიპერლუპის ნიუ-იორკი - ვაშინგტონის დამაკავშირებელი ხაზის აშენებაზე, მთავრობისგან სიტყვიერი თანხმობა მიიღო.

როგორც მისი პოსტიდან ირკვევა, ჰაიპერლუპის ხაზი ოთხ ქალაქს, ნიუ-იორკს, ფილადელფიას, ბალტიმორსა და ვაშინგტონს დააკავშირებს. მისივე თქმით, ახალი სატრანსპორტო საშუალებით, ნიუ-იორკიდან აშშ-ს დედაქალაქში ჩასვლას 29 წუთი დასჭირდება. ამჟამად იმავე მანძილის დაფარვას, მანქანით ან ავტობუსით 4-5 საათი სჭირდება, მატარებლით - 8 საათი, ხოლო თვითმფრინავით საათი და 25 წუთი (ამაში არ ითვლება აეროპორტში რეგისტრაციისა და უსაფრთხოების წერტილების გავლა, ბარგის ჩაბარება-აღება და ა.შ.).

პროექტის დადასტურების შემთხვევაში, ჰაიპერლუპის ხაზი მიწისქვეშ გაშენდება.

თუმცა ვერბალური თანხმობა არ ნიშნავს, რომ აშშ-ს მთავრობამ ოფიციალური ნებართვა გასცა. მომდევნო ტვიტში მასკმა სწორედ ამაზე ისაუბრა.

"ოფიციალური თანხმობის მისაღებად კიდევ ბევრი უნდა ვიმუშაოთ, მაგრამ ოპტიმისტურად ვარ განწყობილი", წერს მასკი.

აღნიშნულ ინფორმაციაზე კომენტარი გააკეთეს ოთხივე ქალაქის მერიის წარმომადგენლებმა. მათი თქმით, ამის შესახებ პირველად გაიგეს, თუმცა პროექტი საინტერესოა და სიამოვნებით გაეცნობიან დეტალებს.