რა ხდება: რუსეთის პრეზიდენტის, ვლადიმირ პუტინის პრესმდივანი, დმიტრი პესკოვი აცხადებს, რომ რუსეთს აქვს "ძალიან განვითარებული ორმხრივი ურთიერთობები" დამოუკიდებელი სახელმწიფოების თანამეგობრობის (დსთ) თითქმის ყველა ქვეყანასთან, საქართველოსა და მოლდოვას გარდა.

  • ამის შესახებ განუცხადა რუსულ პროპაგანდისტულ გამოცემას არგუმენტები და ფაქტები.
  • საგულისხმოა, რომ საქართველო აღარ არის დსთ-ს წევრი ქვეყანა 2006 წლიდან, რადგანაც ამ გაერთიანებაში წევრობა არათავსებადია ნატოში გაწევრიანების სწრაფვისკენ.

დეტალები: "სამწუხაროდ, ეს არ ეხება საქართველოს და მოლდოვას. დანარჩენ ქვეყნებზე თუ ვსაუბრობთ, მათ სუვერენიტეტს აბსოლუტური პატივისცემით ვეპყრობით", — თქვა პუტინის პრესმდივანმა, — "და ამავე დროს, ჩვენ გვახსოვს ჩვენი საერთო ისტორია და ეკონომიკური ურთიერთდამოკიდებულება, რომელიც საბჭოთა ეპოქაში განვავითარეთ."

პესკოვმა ახსენა სომხეთიც და აღნიშნა, რომ რუსეთი ახლა საკმაოდ რთულ პერიოდს განიცდის "მეგობრულ, მოძმე სომხეთთან" ურთიერთობაში და იმავდროულად ისაუბრა იმ ეკონომიკურ სარგებელზე, რომელსაც სომხეთის ეკონომიკა რუსეთში მცხოვრები მოქალაქეების ფულადი გზავნილებით იღებს.

  • "ეს ურთიერთობა უფრო მეტია, ვიდრე ძმური, რადგან აქ [რუსეთში] იმაზე მეტი სომეხი ცხოვრობს, ვიდრე სომხეთში. და, სხვათა შორის, აქ მცხოვრები სომხების ეკონომიკური აქტივობა სომხეთის მთლიანი ბიუჯეტის ძალიან დიდ პროცენტს შეადგენს. ხალხი იქ გზავნის ფულს, საუბარია წელიწადში რამდენიმე მილიარდ დოლარზე", — განაცხადა მან.